आयोगमे २१ प्रतिशत थारु कोटाके माग
पहुरा समाचारदाता
धनगढी, १५ चैत । सुदूरपश्चिम प्रदेश लोकसेवा आयोगसे खोलल् विज्ञापनमे थारु संघ संगठन तथा थारु अगुवाहुक्रे असहमति जनैले बाटै । संविधान विपरित कर्मचारी माग करल कहटी सुदूरपश्चिम प्रदेश लोकसेवा आयोगसे खोलल् विज्ञापन खारेज कैना उहाँहुक्रे माग समेत करले बाटै ।
इहे बिच सुदूरपश्चिम प्रदेश लोक सेवा आयोगसे खोलल् वन रक्षक पदके विज्ञापन खारेज तथा टमान सेवा समूहमे खोलजैना विज्ञापनमे २१ प्रतिशत थारु कोटा निर्धारण करे पर्ना माग सहित थारु अगुवाहुक्रे ज्ञापनपत्र बुझैले बाटै ।
थारु कल्याणकारिणी सभा कैलाली सभापति लाहुराम चौधरीके नेतृत्वमे मंगरके विधायन तथा प्रदेश मामिला समितिके सभापति नेपालु चौधरी ओ सुदूरपश्चिम प्रदेश लोक सेवा आयोगके सचिव रामहरि ज्ञवालीहे ज्ञापनपत्र बुझाइल हो ।
ज्ञापनपत्रमे लोक सेवा आयोगसे संविधान विपरित आह्वान करल तहविहिन वन रक्षक पदके विज्ञापन खारेज करे पर्र्ना, जनसंख्याके आधारमे प्रहरी, प्रशासन लगायत राज्यके हरेक निकायमे समानुपातिक सहभागिताके सुनिश्चितता करे पर्ना, प्रदेशमे थारु समुदायके २१ प्रतिशत जनसंख्याहे न्यायीक सहभागिता सुनिश्चित करे पर्ना माग रहल बा ।
ओस्टके सुदूरपश्चिम निजामती सेवाके गठन, सञ्चालन ओ सेवाके सर्त सम्बन्धमे व्यवस्था कैना बनल विधेयक २०७८ के दफा ३ ओ सुप निजामती कर्मचारी सेवा ऐनके दफा २ के उपदफा १ मे व्यवस्था हुइल ‘उप्पर उल्लेखित दफामे ज्यासुके लिखल रहेलेसे फेन इ दफा बमोजिमके सुविधा १ व्यक्तिसे सेवा अवधिभरमे राजपत्रांकित श्रेणी वा अधिकृतसमके पदमे एकचो ओ राजपत्रांकित सहायकसमके पदमे एकचो किल लेहे पैना’ कना व्यवस्था न्यायसंगत नैरहल ओरसे संसोधन करे पर्ना ओ संविधानमे उल्लेखित सेवा सुविधाहे टमान ऐनमार्फत नियतवश कटौटी नैकैना लगायत माग सहित ज्ञापनपत्र बुझाइल हो ।
नेपालके संविधान अनुसार सरकारी कोटामे समावेशी सिद्धान्त लागू करे पर्नामो प्रदेश लोकसेवा आयोगसे थारु कोटाहे समावेश नैकरल ओरसे थारु समुदायके घोर आपत्ति रहल बा ।
‘संविधानस समावेशी कोटामे थारुहे फेन समेट्ले बा,’ थारु कल्याणकारिणी सभा कैलालीके सभापति चौधरी कहलै, ‘प्रदेश सरकारसे संविधानके मर्म विपरीत थारुनहे छुटाके विज्ञापन खोल्ले बा, इ खारेज हुइ परल ओ लावा विज्ञापन आह्वान करेबर २१ प्रतिशत थारु कोटा अनिवार्य रुपमे निर्धारण करे परल ।’
लोकसेवा आयोगसे विज्ञापनमे औरे जातजाति, वर्ग, समुदायके कोटा छुट्याइल रलेसे फेन थारु समुदायहे किल छुटाइल कहटी उहाँ विज्ञापन खारेज करे पर्ना ओ लावा विज्ञापनमे थारु कोटा फेन निर्धारण करे पर्ना औँल्याइल रहिट ।
ज्ञापन पत्र बुझाइ थाकस केन्द्रीय सदस्य प्रभात कुमार चौधरी, थारु नागरिक समाज कैलाली संयोजक दीलबहादुर चौधरी, थारु अगुवा बुन्दीलाल चौधरी, अधिवक्ता जोहारीलाल चौधरी, थाकस कैलाली उपसभापति माधव थारु लगायतके टोली रहल रहे । बुधके मुख्यमन्त्री ओ कानून मन्त्रीहे समेत ज्ञापन बुझैना कार्यक्रम रहल थाकस कैलाली उपसभापति माधव थारु जानकारी डेलै ।
प्रदेश लोकसेवा आयोगसे चैत ९ गते बुधके प्रदेश निजामती सेवा अन्तर्गत नेपाल वन सेवा, जनरल फरेष्ट्री समूह, तह विहीन, वन रक्षक पदके लाग खुला तथा समावेशी सहित १ सय ६७ पदके लाग विज्ञापन आह्वान करल रहे ।
