व्यावसायिक टिना खेटीमे पथरीवासी
सागर कुस्मी
धनगढी, १६ चैत । भातभन्सामे सीमित रहना महिला आब व्यावसायिक टिना खेटीमे जमल बटैं । धनगढी उपमहानगरपालिका वडा नम्बर १७ पथरी गाउँक् महिला आत्मनिर्भरके लाग पुरे गाउँवासी व्यावसायिक रुपमे टिना खेटीमे लागल बटैं ।
पहिले परम्परागत खेतीपातीमे रहना महिला घरक् ढन्ढामे किल लट्कल रना मनै अझकल व्यावसायिक टिना खेतीमे लागल सोनदेवी चौधरी बटैलैं । उहाँ कलैं, हम्रे पहिले पहिले पुरान चलन अन्सारसे खेती करि, उहिसे घरे खैना किल जुहाए, मने जबसे व्यावसायिक रुपमे लग्ली टबसे जिनगी चलैना सहज हुइल बटैलैं । सोनदेवी चौधरी अझ्कल अपने १० ढुर जग्गामे घैखरसे टिना खेती करे डँटल बटैं । उहाँ अपन बारीमे लौका, टिमाटर, गोभी, आलु, करैला, कब्ली, पियाज, खिरा लगायत मेरमेरिक टिनाटाँवन फरुइटि बटैं ।
इहे टिना खेटीसे उहाँ लागत खर्च कटाके बरसमे १ लाख ५० हजार सम आम्दानी हुइल बटैलैं । इ टिना खेटीसे नगद आम्दानी हुइलेक ओर्से अब्बे उहाँ चार कोठाके पक्की घर फेन बनाइ लागल बटैं ।
अस्टेके, ओहैंके लक्ष्मी चौधरी फेन व्यावसायिक रुपसे टिना खेतीमे लागल बटैलैं । उहाँ कठैं, सुरुमे मै ठोरचे किल टिना लगैनु । औरे खेटीसे एम्ने ठनिक फाइदा हुइहस लागल । टब जाके ढिरे–ढिरे टिना खेती बर्हैटी गैनु उहाँ कहलैं, अब्बे मै १० कठ्ठामे व्यावसायिक रुपमे टिना खेती करटी बटुँ । एम्हें महिन ढेर आम्दानी हुइल उहाँ बटैली ।
उहाँ कहलैं, घरहि रहिके कुछ बहुट कुछ करे सेक्ना पेशा इहे मजा लागल, ओहे ओरसे महिलनके लाग टिना खेती जो ठिके हो उहाँ बटैलैं । लागत खर्च कटाके बरसमे ३ लाखसम फाइदा होजाइठ उहाँ कहलैं । टिना खेटीके आम्दानीसे उहाँके गाउँक् औरे महिला फेन टिना खेतीमे लागल बटैलैं ।
उहाँफें अपने जग्गामे खिरा पाँच, गोभी छे कुन्टल, आलु पाँच कुन्टल, लौका तीन कुन्टल, करैला आठ कुन्टल, कब्ली तीन कुन्टल, टिमाटर आठ कुन्टल ओ मिर्चा डस कुन्टल वार्षिक रुपमे उत्पादन करैठैं । उहाँ अटरै किल नाही लडियक् ढिकुवामे खरबुज्जा फेन डुइ डल्लफ फरैठैं ।
लक्ष्मी कठैं, इन्डियासे टिना अइलेक ओरसे यहाँ हमार उत्पादन करल टिनाके बजार भाउ नैपाइल बटैलैं । इन्डियासे टिना आके अपन टिना घुइयक् भाउमे बिक्री करल बटैलैं । उहाँ कलैं, यदि बाहेर देसके टिना अइना बन्द हुइ कलेसे यहाँ स्थानीय टिना मजा भाउ पाइसेकी ।
सुरु कम आम्दानी हुइलेसे फें पाछे जाके लग्ढार मेहनत कर्टी गैलेसे टिना खेतीमे कौनो फेन घाटा नैरहल चमेली चौधरी कहलैं । उहाँ फें टिना खेटीमे हिरगरसे पस्ना चुहाइ भिंरल बटैं । यहैं कुछ करुँ सोंचके इ टिना खेटीमे लागके उहाँ अब्बे बरस्मे २ लाखसे उप्पर कमाइ भिरल बटैं । यी रकम उहाँके खर्च कटाके कुल बचत हुइना रकम हुइन । ओसिक टे उहाँ एक बरसमे ५ से ६ लाख सम कमैठैं । इहे टिना खेतीसे हुइल आम्दानीसे धनगढीमे १० ढुर जग्गा सम्पत्ति फेन जोर सेक्ले बटैं ।
जाँगर लगाके पस्ना चुहैलेसे सब काममे, रुपिया कमाइ सेक्जाइठ् उहाँ कठैं, मै टे कठुँ हमार थारु लर्कन आनेक डेसमे लेबर कैलसे अपने गाउँघरमे काम करो कैसिक नै कमाइ सेक्जाइ ।
सोनदेवी चौधरी, लक्ष्मी चौधरी ओ चमेली चौधरीहे टिना खेतीमे उहाँ लोगनके गोसिया, लर्कापर्का फेन टिना खेटीमे मद्दत कर्टी बटिन । उहाँ लोगनहे डेखके अझकल गाउँक् बहुटसे महिला लोग फेन टिना खेटीमे लागल बटैं ।
दिनभर बारीमे टिनाटाँवन हेरचाह कैना ओ बिहानके टिना बोक्के धनगढी बजार, अपने गाउँमे थोक ओ खुद्रामे सस्टा भाउमे बेंच्टी आइल बटैं । इहे मेहनत कैके पठरी गाउँक किसान अब्बे गाउँक् धन्यवादके पात्र बनल बटैं । उहाँके परिश्रम डेखके ओहे गाउँक् अन्य किसान फेन टिना खेतीमे लागल बटैं । उहाँ लोग फेन अब्बे टिना खेतीसे मजा आम्दानी करे लागल बटैं । उहाँक् फेन घर परिवारमे खुसी छाँइल बटिन ।
जस्टेक पथरी गाउँंवासीनके अब्बे भविस्य चम्कटी बटिन ओस्टेक औरे गाउँक् किसान लोग फेन व्यावसायिक टिना खेतीमे अपन अपन बारीमे हाँठ गोरा खिवैना जिन पछ्गुरी ।
