महासंघके ६७ औं स्थापना दिवस मनागिल
पहुरा समाचारदाता
धनगढी, १६ चैत । नेपाल पत्रकार महासंघके ६७ औं स्थापना दिवस बुधके रोज धनगढीमे टमान कार्यक्रम कैके मनागिल बा ।
महासंघके स्थापना दिवसके अवसरमे नेपाल पत्रकार महासंघ सुदूरपश्चिम प्रदेश ओ जिल्ला शाखा कैलालीके संयुक्त आयोजनामे धनगढी उपमहानगरपालिका–५, तारानगरस्थित मानवसेवा आश्रमहे खाद्यन्न सामग्री वितरण करल बा ।
खाद्यन्न सामग्री नेपाल पत्रकार महासंघ प्रदेश अध्यक्ष योगेश रावल ओ जिल्ला अध्यक्ष हिमालय जोशी, महासंघके केन्द्रीय सचिव हेमकर्ण विक, केन्द्रीय सदस्य भरत शाह, महासंघके पूर्व केन्द्रीय सदस्य मनमोहन स्वाँर, दिलबहादुर छत्याललगायत पत्रकारहुकनके सहभागितामे मानवसेवा आश्रमके केन्द्रीय सदस्य आदर्श ढकालहे उ खाद्यन्न सामग्री हस्तान्तरण करले रहैं । महासंघ आश्रमहे दश हजार बराबरके खाद्यन्न सामग्री हस्तान्तरण करले रहे ।
विक्रम् संवत् २०७६ सालमे धनगढीमे शाखाके रूपमे स्थापना हुइल आश्रममे हाल १५ महिला, ४० पुरुष ओ बालबालिका कैके ५९ जाने सहयोगापेक्षी (बेसहारा, अशक्त, असहाय, अनाथ, अभिभावकबिहिन, मानसिक तथा शारीरिकरूपमे कमजोर) सडक आश्रित मानवहुक्रे रहल बटैं । आश्रम उहाँहुकनके मानवोचित व्यवस्थापन, औषधोपचार, पालनपोषण ओ जीवन रक्षाके लाग सहयोग करटि आइल बा ।
उ अवसरमे नेपाल पत्रकार महासंघ सुदूरपश्चिम प्रदेश ओ जिल्ला शाखाके आयोजना तथा नेपाल खेलकुद पत्रकार मञ्च कैलालीके संयोजनमे पत्रकारहुकन बीच मैत्रीपूर्ण फूटसल प्रतियोगिता हुइल बा । प्रतियोगितामे पत्रकार दिलबहादुर छत्याल क्याप्टेन रहल समूह पत्रकार भरत शाह क्याप्टेन रहल समूहहे ७–५ गोल अन्तरले पराजीत कराइल रहे ।
प्रतियोगिताके सुदूरपश्चिम प्रदेशके आन्तरिक मामिला तथा कानूनमन्त्री पूर्णा जोशी एक कार्यक्रमके बीच उद्घाटन करले रहि । जिल्ला अध्यक्ष हिमालय जोशीके अध्यक्षतामे हुइल कार्यक्रमके सञ्चालन महासंघके जिल्ला सचिव प्रेम चौधरी करले रहैं ।
