कैलारीके तीन विधेयक पारित

पहुरा समाचारदाता
धनगढी, १६ चैत । कैलारी गाउँपालिकाके विशेष अधिवेशनके १० औं गाउँ सभा बैठकसे तीन ठो विधेयक पारित हुइल बा । बुधके सकारे बैठल गाउँसभा बैठकसे आवश्यक विधेयक पारित करल गाउँपालिकाके प्रवक्ता कमलप्रसाद चौधरी जानकारी डेलै ।

गाउँपालिका एवम् गाउँ सभाके अध्यक्ष लाजुराम चौधरीके अध्यक्षतामे बैठल गाउँसभा बैठकसे ‘कैलारी गाउँपालिका कार्य सम्पादन नियमावली २०७८ सर्वसम्मतसे पारित करल बा । कार्य सम्पादन मूल्याङकनमे कैलारी गाउँपालिका मुलुकमे उत्कृष्ट पाँच पालिकामे परल बा । उ गाउँपालिका उत्कृष्ट पालिकामे परल ओरसे कार्य सम्पादन नियमावली बनाइल हो ।

यिहे करके, सरकारी, सामुदायिक, निजी वन व्यवस्थापनके लाग कैलारी गाउँपालिकाके वन व्यवस्थापन सम्बन्धमे व्यवस्था कैना बनल विधेयकफे गाउँ सभासे पारित करल बा ।

ओस्टेक, कैलारी गाउँपालिकाके खानेपानी तथा सरसफाइ ओ स्वच्छता सम्बन्धमे व्यवस्था कैना बनल विधेयक गाउँ सभासे पारित हुइल बा । तत्काल ओभरहेड ट्याङ्की स्थापना ओ सञ्चालन करे परल ओरसे यी ऐन बनाइल गाउँपालिकाके अध्यक्ष चौधरी बटैलै ।

विशेष अधिवेशनके १० औं गाउँ सभा बैठकमे विधेयक समितिके संयोजक राजेश सुनारसे तीनु विधेयक प्रस्तुत करले रहिट ।
गाउँसभा बैठके गाउँपालिकाके उपाध्यक्ष लक्ष्मी सत्गौंवा, गाउँपालिकाके प्रमुख कार्यकारी अधिकृत वीरबहादुर ऐर, सूचना अधिकारी यगम कलेल, गाउँ सभाके सदस्यहुक्रे ओ कर्मचारीके उपस्थिति रहल रहे ।