गन्ना मिल खुलके किसानन्हे लिरौसि

सागर कुस्मी
बेलौरी, १७ चैत । डस बरस पहिले भारतीय व्यापारीनहे गन्ना बिक्री कैलेसे फेन रकम नैपाइल डुख सहल कन्चनपुरके बेलौरी नगरपालिका–८ के कालुराम डंगौराके अझकल उ झनखन हटल बटिन् ।

‘एक बिघामे लगाइल गन्ना सीमावर्ती भारतीय बसही बजारके व्यापारीनहे बिक्री करुँँ, मने एक रुपैयाँ फेन नैडेके व्यापारी सम्र्पकविहीन होगैल,’ कालुराम कहलैं, ‘पहिलेकसे अझकल यहाँके गन्ना खेटी करुइया किसानन अब्बे सुखसे नाफा करटि बटैं ।’ कालुराम जस्टे कन्चनपुरके डख्खिन क्षेत्रमे गन्ना खेटी करुइया सयौँ किसान अझकल बजारके समस्यासे छुट्कारा पैले बटैं ।

यहाँके बेलौरी १० मे महाकाली सुगर मिल ओ पुनर्वास २ मे रहल भागेश्वर सुगर मिल कैके डुठो चिनी मिल सञ्चालनमे हुइल बाड किसाननहे गन्ना पुगैना सँपार नैहुइन् । पहिले डल्लफमे गन्ना बेंचे भारतमे जाइ, उहाँ कहलैं, अझकल गाउँहिमे मिल खलल् टबसे किसान लोग गन्ना खेटीमे आउर हिरगरके लागल बटैं ।

कन्चनपुरके बेलौरी, पुनर्वास, बेलडाँडी ओ लालझाडी क्षेत्रमे सबसे जेडा गन्ना खेटी हुइटी आइल बा । चिनी मिल सञ्चालन हुइल बाड यहाँ स्थापित हुइल कोल्हु भर विस्थापित हुइल बेलौरी नगरपालिका ८ बिचपुरीके भागीराम चौधरी बटैंलैं । उहाँ चिनी मिल सञ्चालन होके किसान गन्नाके मजा मोल पाइल बटैलैं ।

‘पहिले भारतमे १५० रुपियामे प्रतिकुन्टल गन्ना बेंची,’ उहाँ कहलैं, ‘अब्ब्बे प्रतिकुन्टल पाँच सय ९० रुपयिामे बिक्री हुइटी बा ।’ उहाँ डु बरस एहोंर गन्नाके मोल बर्हल ओरसे गन्ना खेटी करुइया किसान ढेर हुइल बटैं ।

ओस्टेके, पुनर्वास २ कन्चनपुरके जीतराम चौधरी फेन गन्ना खेटीमे जमके लागल बटैं । मै १० बिघामे गन्ना लगाके गुजारा चलाइटुँ, उहाँ कलैं, आब पहिलेक जस्टे गन्ना बिक्री हुइना मने पैंसा नैपैना तनाव हटल बा । २० बरससे गन्ना खेटी करटि आइल जीतराम यहाँ पहिले किसाननहे बिक्रीके लाग बहुट डुख भोगल बटैंलैं । मने आब यहाँ गन्ना उत्पादन बर्हटि गैल बटैलैं । इहे बरस पुनर्वासके रहल भागेश्वर सुगर मिलमे १० लाख क्विन्टल गन्न बेंचल उहाँ बटैलैं । ओस्टेके पुनर्वास नगरपालिका २ के गन्ना खेटी करुइया किसान संगम चौधरी अपने उत्पादन करल गन्नाके मोल सरकार निर्धारण करल गन्नाके मोल पाइ पर्ना बटैलैं ।

उहाँ कहलैं, ‘किसाननके उत्पादन करल गन्नाके मोल किसान अप्नही मोल टोके पर्ना बटैलैं ।’ बेलौरी नगरपालिकाके नगर प्रमुख पोतीलाल चौधरी कन्चनपुर जिल्लाके डख्खिन भेग गन्नाके पकेट क्षेत्रके रुपमे विस्तार हुइटि रहल बटैलैं । ‘बेलौरीमे ६ हजार ५०० बिघा क्षेत्रफलमे गन्ना खेटी हुइटि रहल बा,’ उहाँ कहलैं, ‘तीन हजार ४ सय किसान गन्ना खेटीमे लागल बटैं ।’ उहाँ हरेक बरस गन्नाके मोल बर्हटि गैल ओरसे किसान लोग इ खेटीमे जेडा लगाब हुइटी रहल बटैलैं ।

महाकाली सुगर मिलके प्रशासकीय अधिकृत कालुसिंह ठगुन्ना मिलके लाग २५ लाख क्विन्टल गन्ना आवश्यक हरल बटैलैं । ‘इ समयमे पाँच लाख क्विन्टल खरिद करले बटी,’ उहाँ कहलैं । मिलहे आवश्यक गन्ना अभिन कम हुइल उहाँ बटैलैं । उ मिल २०६७ सालसे सञ्चालन हुइटि बा ।