पत्रकार निष्पक्ष होके कलम चलाइ परल : मन्त्री जोशी
पहुरा समाचारदाता
धनगढी, १८ चैत । सुदूरपश्चिम प्रदेश सरकारके प्रवक्ता तथा कानुनमन्त्री पूर्णा जोशी पत्रकार निष्पक्ष होके कलम चलाइ पर्ना बटैले बाटी ।
कैलालीके अत्तरियामे हुइल पत्रकार क्षमता विकासके लाग सुदूरपश्चिम प्रदेश स्तरीय अभिमुखीकरण कार्यक्रममे उहाँ अइसीन बटाइल हुइटी । उहाँ केक्रोप्रति रिस वैरभाव राखके करजैना पत्रकारिता दिगो नैरहना बटाइल हुइटी ।
उहाँ बहुलवाद समाजमे बिचार सबके आआपन रलेसे फेन केक्रोप्रति पुर्वागृह नैराखके पत्रकारिता करे पर्नामे जोड डेली ।‘हम्रे बहुलवाद समाजमे बाटी । सबके आआपन बिचार बा । मने सेवा डेना बातमे निष्पक्ष बन्ना हो ।
अब्बेक प्रदेश सरकार फेन ओस्टके आघे बह्रटी रहल बा,’ मन्त्री जोशी कहली, ‘सरकारसे करल गलत कार्यके बारेम बरु लेखी मने बिचार अलग रहल कारण भर उहे बिचारसे पत्रकारिता नकरी ।’ मन्त्री जोशी पत्रकारके हकहितके लाग सरकार प्रतिबद्ध रहल बटैली ।
नेपाल पत्रकार महासंघ सुदूरपश्चिम प्रदेशसे आयोजना करल प्रदेश स्तरीय अभिमुखीकरण कार्यक्रम शच्चिरसम चल्ना बा । कार्यक्रममे नेपाल पत्रकार महासङ्घके अध्यक्ष विपुल पोखरेल, प्रदेश समितिके पदाधिकारी, ओ प्रदेशके नौ जिल्लाके महासङ्घके अध्यक्ष ओ कैलालीके पत्रकारहुक्रनके सहभागिता रहल बा ।
