वर्ष खेलाडीके मनोनयन

पहुरा समाचारदाता
धनगढी,१९ चैत । ‘एसपिए सुदूरपश्चिम स्पोर्टस अवार्ड २०७८’ के वर्ष खेलाडीके मनोनयन सार्वजनिक हुइल बा ।

सुदूरपश्चिमाञ्चल एकेडेमीके मुख्य प्रायोजन रहल एसपिए सुदूरपश्चिम स्पोर्टस अवार्डके वर्ष पुरुष खेलाडी ओ वर्ष महिला खेलाडीके मनोनयन सार्वजनिक करल हो । नेपाल खेलकुद पत्रकार मञ्च कैलालीके आयोजना हुइना अवार्डके वर्ष पुरुष खेलाडीके मनोनयनमे व्याडमिन्टनके प्रिन्स दाहाल, क्रिकेटके दिपेन्द्र सिंह ऐरी ओ फुटवलके टेकेन्द्र थापा परल बटै । ओस्टेक महिलाओर भलिबलके सरस्वती चौधरी एथलेटिक्सके राजपुरा पछाई ओ फुटवलके उषा नाथ परल बटी ।

पुरुषओर मनोनयनमे परल प्रिन्स जुनियरओरके विश्व बरियतामे १ नम्बरमे रहल बटै । दिपेन्द्र अन्तराष्ट्रिय क्रिकेटमे शतक ओ अर्धशतक सहित टी ट्वान्टीमे सर्वाधिक रन बनैना नेपाली खेलाडी हुइट । नेपाली पुरुष फुटबलके टीममे परल टिकेन्द्र थापा पहिल बार नेपालके लाग अन्तराष्ट्रिय डेब्यु करले बटै । उहाँ जावलाखेल युथ क्लबकाट ए डिभिजन लिग खेल्टी आइल बटै ।

महिलाओर मनोनयनमे परल सरस्वती नेपाली महिला भलिवल टोली बंगलादेशमे सेन्ट्रल जोन भलिबलमे स्वर्ण जिटेबेर उत्कृष्ट प्रदर्शन करल रहिट कलेसे घरेलु प्रतियोगितामे सानदार प्रदर्शन करटी आइल बटी । उषा उमेर समुह हुइटी नेपाली महिला फुटवल टोलीमे स्थान बनैना सफल हुइल बटी । उहाँ राष्ट्रिय महिला लिगके उत्कृष्ट गोलरक्षक बनल रहिट । एथलेटिक्सके राजपुरा–भारतके नागाल्यान्डमे हुइल साफ क्रस कन्ट्री दौडमे रजत पदक जिटल रहिट कलेसे १५औं ओ १६औं संस्करणके पोखरा म्याराथनके उपाधिफे जिटल रहिट ।

टमान ८ विधामे डेना अवार्डके टिसरा संस्करणके तयारी तिव्र रुपमे हुइटी रहल बा । उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ८ विधामे अवार्ड डेना बा । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान करजाई ।

उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत कैना आयोजक नेपाल खेलकुद पत्रकार मञ्च कैलाली जनैले बा । ओस्टेक सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी, मेडल ओ प्रमाणपत्र प्रदान करजाई ।

‘एसपिए सुदूरपश्चिम स्पोर्टस अवार्ड’के टिसरा संस्करणके मुख्य प्रायोजक धनगढीके सुदुरपश्चिमाञ्चल एकेडेमी रहल बा कलेसे मुख्य प्रबद्र्धकमे सुदूरपश्चिम प्रदेश खेलकुद परिषद् रहल बा । ओस्टेक वर्षके पुरुष खेलाडी विधाहे काठमाण्डौंके मास ह्युम रिर्सोस ओ बर्ष महिला खेलाडी विधाहे वनदेवी युवा क्लबसे प्रायोजन करले बा । सह–प्रायोजकमे केल्मी रहल बा ।