‘कानून निर्माण प्रक्रियामे नागरिक सहभागिता न्यून’
पहुरा समाचारदाता
धनगढी, १९ चैत । स्थानीय सरकारके कानून निर्माण प्रक्रियामे नागरिकहुकनके सहभागिता न्यून डेखल एक अध्ययन प्रतिवेदनमे डेखल बा ।
यूएसएडके आर्थिक सहयोग तथा गैर सरकारी महासंघ सुदूरपश्चिम प्रदेशके आयोजनामे शनिच्चरके धनगढीमे हुइल एक कार्यक्रममे प्रस्तुत हुइल प्रतिवेदनमे ओसिन डेखल बा ।
कानून निर्माण प्रक्रियाके अवस्थाबारे प्रतिनिधिमुलक चार पालिकाके अध्ययन अनुसन्धानके क्रममे ओसिन डेखल प्रस्तुतकर्ता सुप विश्वविद्यालयके प्राध्यापक दिपक चन्द्र भट्ट बटैलै । जेम्ने कञ्चनपुर जिल्लाके भीमदत्तनगरपालिका, बेदकोट नगरपालिका, दोधारा चाँदनी नगरपालिका ओ कृष्णापुर नगरपालिकाके अध्ययन करल रहे ।
प्रस्तुतकर्ता भट्ट कहलै, अध्ययनके क्रममे प्रदेश सरकार जनचासोके सवालमे कानून नइबनाइल, मने स्थानीय पालिका अपनेहुक्रे काम चलैना हुइलेसेफे कानून बनाइल डेखल बा । सीमाना जोरल विवादित क्षेत्रके बारेमे गम्भीर नइडेखल हो । प्रशासनिक झमेलसे बाँचेक लाग कानून बनाइल मने कार्यान्वयन नइहुके कागजमे सिमित रहल भट्ट कहलै ।
कानून निर्माणमे कम चासो डेहल, बनाइ कानून जनसहभागितामे छलफल विना विद्यायन समिति लैगिल डेखलफे प्रस्तुत कर्ता प्राध्यापक भट्ट बटैलै । बनाल कानून जानकारी डेहक लाग मिडिया मोभिवाइजेशन हुइना जरुरी रहलफे उहाँ सुझाव डेलै ।
सुदूरपश्चिम प्रदेशके मुख्य न्यायधिवक्ता कुलानन्द उपाध्याय कानून निर्माणके लाग गाइड लाइन नइरहल बटैलै । जनप्रतिनिधिहुक्रे अपनेहुक्रे पाई पैना ढेर कानून बनाइल मने जनताके सेवा सम्बन्धी कानून कममात्रमे बनल बटैलै । अब्बेक आवश्यकता शिक्षा, स्वास्थ्य, खानेपानी सम्बन्धी कानून हाली बने पर्ना रहे उहाँ कहलै, मने बनल कानूनफे कार्यान्वयनमे नइआइल हो ।
आन्तरिक मामिला तथा कानून मन्त्रालयके सहसचिव विश्वजित बेस्रा बन्टी रहल कानून निर्माणबारे जनसहभागिताके उपस्थितिमे छलफलके लाग बजेट न्यून रहल बटैलै ।
गोदावरी नगरपालिका नगर उप–प्रमुख तथा नेपाल नगरपालिका संघके उपसंयोजक रत्ना कडायत आम नागरिकके सहभागितामे बनाइल कानून विश्वासनिय, अपनत्व ओ दिगो रहल बटैली । गोदावरी नगरपालिकासे अभिनसम ५१ ठो कानून बनाइल उहाँ बटैली ।
फाया नेपालके धनपति ढुङेल संघीय अइलेसेफे केन्द्रीकृत सोच परिवर्तन हुई नइसेकल बटैलै । मुक्तकमैया महिला विकास मञ्चके कौशिला चौधरी मुक्तकमैया कमलरी मुक्त हुइल नम्मा समय आइल मने ओइनके लाग नीति नइबनल बटैली । इन्सेकके कैलाश पनेरु इन्सेक प्रदेश कार्यालयफे पाँच जिल्लाके १० पालिकामे काम करटी रहल मने बनल कानूनबारे कार्यपालिका सदस्यहुकनके पत्ता नइरहल बटैलै ।
उहाँ कहलै, पालिका सदस्यहुक्रे बनल कानुनबारे पत्ता नइहुइलेसे तालि बजाके पास भर करटी रहल पाइल बा । कार्यक्रममे याक नेपालके अध्यक्ष धनबहादुर रावल, सीएसएसडीके देवी थापा, एनएनडिएस डब्लु ओके चक्र विकफे कानून निर्माण करेबेर छलफलके लाग नागरिकसम लगैना जरुरी रहल बटैलै ।
गैर सरकारी महासंघ सुदूरपश्चिम प्रदेश अध्यक्ष देवीप्रसाद खनालके अध्यक्षतामे हुइल कार्यक्रममे केन्द्रीय सचिव भवराज रेग्मी सहजीकरण करले रहिट । कलेसे संचालन प्रदेश सचिव लोकमान धामी करले रहिट ।
