सहकारी दिवसके अवसरमे वक्तित्वकला प्रतियोगिता
पहुरा समाचारदाता
धनगढी, २० चैत । हिमशिखर बहुउद्देश्यी सहकारी संस्था अपन ६५ औँ सहकारी दिवसके अवसर पारके वक्तित्वकला प्रतियोगिता करले बा । सहकारी दिवसके अवसरमे ‘आर्थिक समृद्धिमे सहकारीके भूमिका’ विषयक माध्यामिक विद्यालयस्तरीय वक्तित्वकला प्रतियोगिता हुइल हो । अँट्वारके हुइल प्रतियोगितामे धनगढी उपमहानगरपालिकाके २० विद्यायके सहभागिता रहल रहे ।
प्रतियोगितामे धनगढीके ग्यालेक्सी माध्यामिक विद्यालयमे अध्ययनरत जानवी जोशी प्रथम हुइल बटि । ओस्टेक, त्रिनगर माध्यामिक विद्यालयमे अध्ययनरत बमबहादुर विक द्वितीय, एरिष्टो इङलिस बोर्डिङ स्कूलमे अध्ययरत अमिशा गिरी तृतीय ओ धनगढी नमुना माध्यामिक विद्यालयमे अध्ययरनत प्रविन चन्द सान्त्वना हुइल बटैं ।
प्रतियोगितामे सहभागीहुकनहे नगद ओ प्रमाणपत्रसहित पुरस्कृत करल बा । प्रतियोगितामे प्रथम हइलहे १० हजार , द्वितीयहे ७ हजार, तृतीयहे पाँच हजार ओ सान्त्वना हुइलहे ३ हजार रुपैयाँ पुरस्कार डेहल बा ।
जिल्ला सहकारी संघ कैलालीके अध्यक्ष फणिराज सापकोटा उद्घाटन करल कार्यक्रम हिमशिखर सहकारीके अध्यक्ष दुर्गा भण्डारीके अध्यक्षतामे हुइल रहे । कार्यक्तममे राष्ट्रिय सहकारी बैंक धनगढी शाखा प्रमुख कृष्णबहादुर रावलके फेन उपस्थिति रहे ।
हिमशिखर सहकारीका प्रबन्धक महेन्द्र्र शाही स्वागत कार्यक्रममे सञ्चालन शिक्षा उपसमिति सदस्य सुवास भण्डारी करले रहैं ।
धनगढी–५, तारानगरमे प्रधान कार्यालय रहल सहकारीके सेवा केन्द्र हसुलिया ओ अत्तरियामे रहल बा । सहकारीके कार्यक्षेत्र धनगढी उपमहानगरपालिका, गौरीगंगा नगरपालिका, कैलारी गाउँपालिका ओ गोदावरी नगरपालिका रहल बा ।
