न्यायमे पहुँच अभिबृद्धिसम्बन्धी अन्तरक्रिया कार्यक्रम
पहुरा समाचारदाता
धनगढी, २१ चैत । धनगढी उपमहानगरपालिका न्यायिक समितिके आयोजनामे सोम्मारके रोज धनगढीमे न्यायमे पहुँच अभिबृद्धि करेक लाग सरोकारवाला तथा सञ्चारकर्मीहुकनसँग १ दिने अन्तरक्रिया कार्यक्रम हुइल बा ।
कार्यक्रममे धनगढी उपमहानगरपालिका उपप्रमुख तथा न्यायिक समितिके संयोजक सुशीला मिश्र भट्ट पीडितहे न्याय डेहेक लाग सबजहनहे कानूनके बारेमे बुझाइ परना आवश्यक रहल बटैलि । उहाँ धनगढी उपमहानगरपालिका अपन क्षेत्राधिकार भित्तर रहिके पीडितहुकनके समस्याके समाधान करटि रहल बटैलि । “अन्यायमे परलहुकनके लाग पालिका सुरक्षित आवासगृह बनैले बा,” उहाँ कलि, “अन्यायमे परल महिलाके लाग एक रातके लाग हुइलेसे फेन सुरक्षित आवासगृहके आवश्यकता परठ ।” ओस्टेक उहाँ अन्यायमे परलहे न्यायके अनुभूति कराइक लाग मनोपरामर्शके फेन आवश्यकता रहल बटैलि ।
कार्यक्रममे धनगढी उपमहानगरपालिकाके प्रशासकीय अधिकृत सुरेन्द्र कार्की संविधानमे रहल व्यवस्था अनुसार धनगढी उपमहानगरपालिका अपन काम, कर्तव्य ओ अधिकारके प्रयोग करटि रहल बटैलैं । उहाँ पालिकाके क्षेत्राधिकार भित्तर परल मुद्दाके उचित न्यायिक निरुपरण करल बटैलैं ।
कार्यक्रममे नेपाल पत्रकार महासंघ केन्द्रीय सचिव हेमकर्ण विक, पत्रकार टेकराज जोशी, भीम चौधरी, रमा चन्द, अमिता कुँवर, मीना सिंह, कृष्ण चौधरी, जुद्ध रावल, चन्द्रा सिंह, मीना भण्डारीलगायत मन्तव्य व्यक्त करले रहैं ।
न्यायिक समिति विद्यालयस्तरमे वडास्तरके मेलमिलापकर्ता, किशोरकिशोरी, भलमन्सा, स्वयम्सेविका, न्याययिक समिति, अर्धन्यायिक समितिलगायतके सरोकारवालाहुकनसँग अन्तरक्रिया कार्यक्रम करटि आइल बा ।
