प्रति १ लाखमे ११ हजारहे टाइफाइड

पहुरा समाचारदाता
धनगढी, २३ चैत । धनगढी उपमहानगरपालिकामे आजसे टाइफाइड रोग विरुद्धके खोप अभियान सुरु हुइटा । कलेसे खोप अभियान देशभर यिहे चैत २५ गतेसे २०७९ वैशाख १८ गतेसम सञ्चालन हुइना बा । धनगढी उपमहानगरपालिका स्वास्थ्य शाखासे मंगरके रोज धनगढीमे टाइफाइड रोज विरुद्ध खोप अभियान तथा नियमित खोपमे टाइफाइड खोपके सुरुवात पालिकास्तरीय खोप समन्वय समितिके अभिमुखीकरण कार्यक्रम कैके जानकारी करैले रहे ।

धनगढी उपमहानगरपालिकाके स्वास्थ्य शाखा प्रमुख डा. कृष्णबहादुर बोहरा टाइफाइड रोग उपचार नैकरैलेसे करिब १० प्रतिशत संक्रमित ३ महिनासे पाछेसम औरेहे सारे सेक्ना बटैलै । उहाँ कहलैं, ‘५ प्रतिशत व्यक्तिहुकनके पित्त थैलीमे व्याक्टेरिया लम्मा समयसम रहिके औरेहे संक्रमण करैनाके साथे व्यक्तिहे पित्त थैलीके क्यान्सर फेन हुइ सेक्ना हुइल ओरसे सरकार टाइफाइड रोग विरुद्धके खोपहे अभियानके रूपमे आघे बह्राइल बा ।’

उहाँ टाइफाइड संक्रमण हुइलमे उच्च जुरी, जार लग्ना, पस्ना अइना, कपार ओ डेह पिरैना, जिभमे सेह्रनी लग्ना हुइलेसे फेन पाछे जाके सानो आन्द्रामे घाउ हुइना, रगत बहना, डोँडर परना, शरीरके टमान भागमे संक्रमण फैलना, मस्तिष्कसम्बन्धी जटिल समस्या हुइ सेक्ना बटैलैं । ओस्टके, टाइफाइड संक्रमण हुइल व्यक्तिके पेट पिरैना, हेग्नी लग्ना, कब्जियत, शरीरमे हल्का लाल फोका अइना, सुख्खा खोखी लग्ना, भुख नैलग्ना, वाकवाकी लग्ना उहाँ बटैलैं ।

उहाँ टाइफाइड रोगसे बचेक लाग स्वास्थ्य सरसफाइ प्रवद्र्धन करेपरनामे जोड डेलैं । उहाँ टाइफाइड रोगसे बचेक लाग एकडम सफा चर्पी प्रयोग करना ओ लर्कनके दिसा चर्पीमे फेँकाइ परना, समय समयमे साबुन पानीले मिसमिस हात धोइना, मजासे पकाइल खाना किल खैना ओ खाना टोपके ढरेपरना बटैलैं । ओस्टेक, बासी, सरलगलल, माँछी लागल खैना चिज नैखैना, एकडम सफा ओ सुरक्षित पानी किल प्रयोग करे परना बटैलैं ।

उहाँ यी खोपहे विश्व स्वास्थ्य संगठनसे गुणस्तर प्रमाणित हुइल ओरसे सुरक्षित रहल ओ ९६ प्रतिशतसे ढेर प्रभावकारी रहल जानकारी करैलै, कलेसे यी खोप १ मात्रा लगाइ परना फेन बटैलैं । उहाँ यी खोप लगाइलबाद खोप लगाइल ठाउँमे लाल हुइना, सुवैना, पिरैना, हल्का जुरी अइना, कपार पिरैना, आलस लग्ना, हातगोर जोर्नी पिरैना, वाकवाकी लग्ना, उल्टी हुइनाके साथे किहुकिहुहे एनाफाइल्याक्सिस् प्रतिक्रिया (अत्यन्ते कम संख्यामे) हुइ सेक्ना बटैलैं । उहाँ अइसिन समस्या कुछ समयमे अप्नही ठिक होजैना फेन बटैलैं । ओ, यदि किहुहे ढेर समस्या डेखैलेसे स्वास्थ्यकर्मी ओकर समाधानके लाग तयारी अवस्थामे रहल फेन डा. बोहरा बटैलैं ।

उहाँ टाइफाइड रोग विरुद्धके खोप १५ महिना पुगल सबहे लगाइ मिल्ना बटैलैं । स्वास्थ्य शाखा प्रमुख बोहरा कलैं, “अब्बे भर १५ महिनासे १५ वर्ष टरेकहे यी खोप लगैना सुरु हुइल बा । सुक्ष्म योजना अनुसार धनगढी उपमहानगरपालिकाके ५७ हजार ७ सय ८२ जहनमे खोप लगैना लक्ष्य रहल बा ।” उहाँ १५ वर्षसे टरेक बालबालिकनमे टाइफाइडके संक्रमण ढेर हुइना फेन बटैलैं ।

कार्यक्रममे धनगढी उपमहानगरपालिका स्वास्थ्य शाखाके जनस्वास्थ्य निर्देशक योगेश अवस्थी नेपालमे खोपसे बचाइ सेक्ना रोगहे शुन्य अवस्थामे पुगाइक लाग टाइफाइड रोग विरुद्धके राष्ट्रिय खोप कार्यक्रम सुरुवात हुइल बटैलैं । विश्व स्वास्थ्य संगठन प्रति १ लाख जनसंख्यामे १ सयसे ढेर संक्रमण दर रहल अवस्थाहे उच्च दरमे वर्गीकरण करले बा । उहाँक अनुसार नेपालमे प्रति १ लाख जनसंख्यामे ११ हजार टाइफाइड रहल ओरसे टाइफाइड रोग विरुद्धके राष्ट्रिय खोप कार्यक्रम सुरु हुइल बटैलैं । ओस्टेक, नेपालके अस्पताल भर्ना हुइना कारणमध्ये टाइफाइडके रोगी चौठा कारण रहल उहाँ बटैलैं ।

एकीकृत स्वास्थ्य सूचना व्यवस्थापन प्रणालीके प्रतिवेदन अनुसार नेपालमे विगत ५ वर्षके तथ्यांक अनुसार हरेक वर्ष करिब ४ लाख ५० हजार जाने टाइफाइड संक्रमित हुइठैं ।

विगत ३ वर्षके तथ्यांक अनुसार पानी ओ खैनाचिजसे हुइना संक्रामक रोगमध्ये टाइफाइड तेसर स्थानमे रहल बा । ओस्टेक, एकीकृत स्वास्थ्य सूचना व्यवस्थापन प्रणालीके प्रतिवेदन अनुसार विगत ५ वर्षके तथ्यांक अनुसार धनगढीमे २ हजारसे लेके २ हजार ५ सय व्यक्तिहे टाइफाइडके संक्रमण हुइल बा ।

स्वास्थ्य शाखाके जनस्वास्थ्य निर्देशक अवस्थी समुदायमे टाइफाइड रोग विरुद्ध प्रतिरोधात्मक क्षमता बह्रैना अभियान तथा नियमित खोपमे यी खोपके कभरेज सक्कु तहमे ९५ प्रतिशत पुगैना उद्देश्य रहल बटैलैं । उहाँक अनुसार धनगढीमे खोप अभियान सञ्चालनके लाग तयारी पूरा हुइल फेन जानकारी करैलैं ।

कार्यक्रममे धनगढी उपमहानगरपालिका अन्तर्गतके वडाध्यक्ष, संचारकर्मी, सरोकारवालाहुकनहे सहभागिता रहल रहे ।