अध्यक्षमे दिनेश दहित चयन
पहुरा समाचारदाता
धनगढी, २३ चैत । थारु पत्रकार संघ कैलालीके साधारण सभा तथा चौठा जिल्ला अधिवेशन बुधके राज धनगढीमे निम्जल बा । अधिवेशनसे दिनेश दहितके अध्यक्षतामे ११ सदस्यीय नयाँ कार्यसमिति चयन हुइल बा ।
कार्यसमितिके उपाध्यक्षमे रतनलाल चौधरी, सचिवमे दिलबहादुर चौधरी, कोषाध्यक्षमे विवश चौधरी, सहसचिवमे अनिता चौधरी चयन हुइल बटैं । ओस्टेक, सदस्यमे प्रेमलाल चौधरी, गीता चौधरी, नरेन्द्र चौधरी, मोतीराम चौधरी, राजु चौधरी, श्रीशा राना चयन हुइल बटैं ।
ओस्टेक, थारु पत्रकार संघ नेपालके यिहे चैत २५ ओ २६ गते नवलपुरके अमलटारीमे हुइना पाँचौं राष्ट्रिय महाधिवेशन तथा १० औं साधारण सभाके लाग केन्द्र्रीय प्रतिनिधि छनौट करल बा । केन्द्रीय प्रतिनिधिमे प्रेम चौधरी, भीमबहादुर चौधरी, ईन्दु चौधरी, लखन चौधरी, मुकेश टेंर्रा, अविनाश चौधरी, राम दहित, सागर कुश्मी, विदेश चौधरी छनौट हुइल बटैं ।
यीआघे थारु पत्रकार संघके केन्द्रीय उपाध्यक्ष उन्नती चौधरी उद्घाटन करल कार्यक्रम जिल्ला अध्यक्ष प्रेम चौधरीके अध्यक्षतामे हुइल रहे ।
कार्यक्रममे नेपाल अदिवासी जनजाति पत्रकार महासंघ (फोनिज) के पूर्व केन्द्रीय सल्लाहकार गणेश चौधरी थारु समुदायके मुद्दा उठानके लाग थारु पत्रकारहुकनके अहम भूमिका रहल बैलैं । कार्यक्रममे संघके जिल्ला निवर्तमान कोषाध्यक्ष भानुप्रताप राना, प्रेस चौतारीके प्रदेश सदस्य छपिलाल चौधरी, फोनिज जिल्ला अध्यक्ष राम दहितलगायत शुभकामना व्यक्त करले रहैं ।
