कैलालीके किसानहे कृषि सामग्री हस्तान्तरण

पहुरा समाचारदाता
धनगढी, २३ चैत । कृषि ज्ञान केन्द्र कैलालीसे किसानहे ५० प्रतिशत अनुदानमे कृषि सामग्री हस्तान्तरण करल बा । चालु आर्थिक बरस २०७८/७९ के वार्षिक स्वीकृत कार्यक्रम अनुसार प्रधानमन्त्री कृषि आधुनिकीकरण परियोजना अन्तर्गत तरकारी ब्लक कार्यक्रम सञ्चालनके लाग श्री मजगाँउ समन्वय कृषक समूहहे टमान मेरिक कृषि सामग्री हस्तान्तरण करल हो ।

कृषि ज्ञान केन्द्र कैलालीके प्रमुख खगेन्द्रप्रसाद शर्मा मजगाँउ समन्वय कृषक समूहके अध्यक्ष चन्द्रप्रकाश चौधरीहे पावर टिलर २० एचपी एक थान, मिनी लिटर ७ एचपी डीजल इन्जिन २० थान, बाँसके प्लाष्टिक घर ५० थान, बोरिङके लाग ठोकाइ १५ मिटर, जी आई पाइप ४ इन्च १५ मिटर,प्लाष्टिक स्प्रेयर १६ लिटरके ४८ थान, इलेक्ट्रिक तराजु दुई थान, इन्सेक्ट नेट ३० केजी, प्लाष्टिक क्रेक ५६ थान हस्तान्तरण करल हो ।

विगतके २ बरस उ क्षेत्रमे पकेट कार्यक्रम लागु करल रलेसे फेन इ बरस आवश्यकताके आधारमे उहे मोडालिटीके परिमार्जित ब्लक विकास कार्यक्रम लागु करल कृषि ज्ञान केन्द्र कैलालीके प्रमुख शर्मा बटैलै ।

‘कार्यक्रमके समन्वय केन्द्र ओ प्रदेश सरकार कैना रलेसे फेन सञ्चालन तथा कृषक परिचालन भर समन्वय समूह करी’, उहाँ कहलै, ‘इ क्षेत्रहे आगामी बरसमे जोन हुइटी सुपर जोनके रुपमे स्थापित करब ।’

गोदावरी नगरपालिका वडा नम्बर ८ के वडाध्यक्ष नरेशबहादुर अधिकारी विगतके बरसमे राजनीतिक पहुँचमे किल कृषक सामाग्री पैना करल रलेसे फेन इ बरस भर कृषि ज्ञान केन्द्र किसानके घरमे पुगके कृषि सामग्री हस्तान्तरण करल ओरसे भइ बर राजनीतिक पहुँचबाहर हुइ सेक्ना बटैलै । उहाँ आगामी दिनमे फेन राजनीतिक पहुँचमे नैहोके किसानके समस्याहे मध्यनजर कैके कृषि सामग्री वितरण कैना समेत आग्रह करलै ।

ओस्टके सामग्री वितरणके लाग वडाभिट्टर रहल टमान ७ कृषक समूहहे समेटल मजगाउँ समन्वय कृषक समूहके अध्यक्ष चन्द्रप्रकाश चौधरी जानकारी डेलै । बेमौसमी तरकारी खेतीके लाग प्रख्यात मानल उ क्षेत्रमे सक्रिय रुपमे लागल किसानहे वडा कार्यालयके सिफारिस ओ पहिचानके आधारमे सामग्री वितरण करल चौधरी बटैले बाटै ।

‘सरकारके इ कार्यक्रमसे हम्रहीनहे काम कैना थप सहयोग मिलल बा’, चौधरी कहलै, ‘आगामी दिनमे आउर बृहत् योजना तथा कार्यक्रमके अपेक्षित बाटी ।’

गत बरस लागु करल कृषि पकेट क्षेत्र कार्यक्रममे अपने सहभागिता जनाइल स्थानीय किसान फुलराम चौधरी उ कार्यक्रम आपनलाग फलदायी रहल बटैलै ।

मानवीय सहयोगके भावनाहे आत्मसाथ कैटी इ बरस आवश्यकताके आधारमे औरे किसानहे पाला डेहल बटैटी चौधरी इ कार्यक्रमके निरन्तरताके सवालमे सम्बन्धित निकाय विशेष ध्यान डेहे पर्नामे जोड डेलै ।

ओस्टके बेमौसमी तरकारी खेती कैटी आइल माया चौधरी फेन सरकारसे ५० प्रतिशत अनुदानमे कृषि सामग्री पाके खुसी लागल बटैली । आपन पेशाहे अइना दिनमे थप प्रोत्साहन कैटी सक्रिय रुपमे काम कैना चौधरीके कहाइ बा ।