धनगढीमे ‘मेट्रिक ठेगाना’ प्रणालीके सुरुवात

पहुरा समाचारदाता
धनगढी, २३ चैत । कैलालीके धनगढी उपमहानगरपालिकाले मेट्रिक ठेगाना प्रणालीके सुरुवात करल बा । प्रणालीके बुधके धनगढीके एलएनचोकसे मेयर नृपबहादुर वड उ प्रणालीके उद्घाटन करल हुइट ।

मेट्रिक ठेगाना प्रणाली अन्तर्गत घर–घरमे प्लेट जडान करजैना बा । मेयर वड धनगढीके वडा नम्बर एक एलएनचोकमे रहल निजी घरमे नम्बर प्लेट लगाके प्रणालीके सुरुवात करल हुइट । सुरुवातमे उपमहानगरके १, २, ३, ४ ओ ५ मे इ प्रणाली लागू करजैना मेयर वड बटैलै ।

‘आघेक बरस नै इ कार्यक्रमके सुरुवात कैना कार्यक्रम रहल रहे,’ मेयर वड कहलै, ‘कोरोनाके कारण हुइ नैसेकल । पहिल चरणमे १, २, ३, ४ ओ ५ मे सुरु करजैना बा । ढिरेसे १९ वडामे विस्तार करजैना बा ।’

सहरी व्यवस्थापनके टमान तत्वमध्ये ठेगाना प्रणाली एक महत्वपूर्ण पक्ष रहल उपमहानगरपालिकाके प्रमुख प्रशासकीय अधिकृत रामलाल श्रेष्ठ बटैलै । इहीसे आमरूपमे ‘घर नम्बर’ कहिके बुझ्ना करल उहाँके कहाइ बा ।

‘इ प्रणालीसे सहरवासीहे सरकारके निकाय ओ अन्य टमान सेवाप्रदायकसे प्रदान कैना सेवा सुविधा सहज बनैनासे प्रत्यक्ष सरोकार राखी,’ उहाँ कहलै, ‘सेवाप्रदायक ओ उपभोक्ता (घर परिवार)डुनु पक्षहे इहीसे सेवा प्रदान तथा ग्रहण कैना प्रभावकारी बनैना सहयोग करी ।’

डगराके चोक तथा मिलन विन्दुसे कौनो निश्चित घरके दूरी (लम्बाइ)के आधारमे घर ठेगाना पत्ता लगाइ सेकजैना इन्जिनियर दिजराज भट्ट बटैलै ।

‘चोकके दूरीहे आधार मानके घरके नम्बर, टोल ओ डगराके नाउँ उल्लेख कैके उहे आधारमे करजैना ठेगाना प्रणालीहे मेट्रिक ठेगाना प्रणाली कहिजाइठ्,’ इन्जिनियर भट्ट कहलै, ‘इ प्रणालीसे डगराके नाउँ ओ दूरीके आधारमा घर नम्बर प्रदान कैना हुइल कारण जुनसुके मनैनहे फेन घर पता लगैना सहज हुइना बा ।’

दूरीके आधारमे घर नम्बर राखजैना हुइल ओरसे घर पता लगैना समस्या नैहुइना ओहकान कहाइ रहल बा । घरसँग जोरल डगराके सुरुके विन्दुसे घरके मूल ढोकासमके दूरी घरके नम्बर प्लेटमे राखल हुइल ओरसे घर पता लगैना सहज हुइना भट्ट कहलै ।