‘अब धनगढी दौडिन्छ’ के तयारी पूरा
पहुरा समाचारदाता
धनगढी, २४ चैत । ‘अब धनगढी दौडिन्छ’ के आठौं संस्करणके तयारी पूरा हुइल बा । पराैं (चैत २६ गते) शनिच्चरके रोज आयोजना हुइना हाफ म्याराथन दौड प्रतियोगिताके तयारी पूरा हुइल आझ पत्रकार सम्मेलन कैके आयोजक धनगढी जेसिस जनैले बा ।
लावा बरसके उपलक्ष्यमे हरेक बरस वैशाख १ गते हुइटी आइल प्रतियोगिता इ बरस २६ गते हुइना जेसिसके अध्यक्ष भुवन पाण्डे बटैलैं । उहाँक अनुसार चुनाव लगायत टमान कारणसे इ बरस प्रतियोगिता आघे सारे परल बटैलै ।
‘अब धनगढी दौडिन्छ’ कना मूल नारा सहित हुइना प्रतियोगिता इ बरस ‘मुख्यमन्त्री जेसिज एभरेष्ट धनगढी हाफ म्याराथन २०२२’ के रुपमे हुइना हुइल हो । धनगढी रंगशालासे शुरु हुइना दौड प्रतियोगिता २१ दशमलव १ किलोमिटरके रहना प्रतियोगिताके संयोजक महेश्वर ओझा जानकारी करैलैं ।
उहाँ प्रतियोगितामे २१ दशमलव १ किलोमिटरके खुला दौड, ५ किलोमिटरके कर्पोरेट ओ सञ्चार, ५ किलोमिटर महिला ओ विद्यार्थी तथा ट्राइसाइकल रेस आयोजना हुइना फेन जानकारी करैलैं । उहाँक अनुसार प्रतियोगितामे पाँच सयसे लेके छ सय जहनके सहभागिता रना अनुमान रहल बटैलैं ।
ओस्टेके, दौड प्रतियोगितामे खुला ओर प्रथम हुउइया ५५ हजार ५ सय ५५ रुपैयाँ, डुसरा ३३ हजार ३ सय ३३ रुपैयाँ ओ टिसरा हुउइया २२ हजार २ सय २२ रुपैयाँ पुरस्कार रहल संयोजक ओझा बटैलैं ।
ओस्टके, कर्पोरेट ओ सञ्चार ओ महिला तथा विद्यार्थी ओर पहिल, डुसरा ओ टिसरा हुउइया क्रमशः ५ हजार ५ सय ५५, ३ हजार ३ सय ३३ ओ २ हजार २ सय २२ रुपैयाँ पुरस्कार पैना आयोजक धनगढी जेसिज जनैले बा ।
प्रतियोगितामे सहभागी हुइक लाग रजिष्ट्रेशन शुल्क ३ सय (टिसर्ट सहित) ओ विद्यार्थीके लाग रजिष्ट्रेशन शुल्क २ सय (टिसर्ट सहित) निर्धारण करल बा । ओस्टेक, रजिष्ट्रेशनके लाग प्रतियोगिता हुइना समयसम करे सेक्ना अवसर फेन डेहल संयोजक ओझा बटैलैं ।
यकर साथे सहभागी धावकमध्ये गोला प्रथासे एकजाने भाग्यशाली धावकहे आकर्षक उपहार प्रदान कैना समेत आयोजक जनैले बा ।
कार्यक्रममे खेलकुद परिषद सुदूरपश्चिम प्रदेशके सदस्य दीपक सिंह, नवजीवन सहकारी संस्थाके अध्यक्ष देवबहादुर बम, धनगढी जेसिस वर्ष २००७ के अध्यक्ष करुणाकर पाण्डेलगायत मन्तव्य व्यक्त करले रहैं ।
