विद्यार्थीहुकनहे ३ लाख ६० हजार बराबरके युनिक छात्रवृत्ति
पहुरा समाचारदाता
बर्दिया, २४ चैत । युनिक नेपालसे ६० जाने विद्यार्थीहुकनहे युनिक छात्रवृत्ति प्रदान करले बा । ६० जाने विद्यार्थी मन्से १० जाने विद्यार्थीहुकनहे रु. १० हजारके दरसे ५ वर्ष समके लाग दीर्घकालिन छात्रवृत्ति ओ ५० जाने विद्यार्थीहुकनहे रु. ७ हजारके दरसे छोट अवधीके छात्रवृत्ति प्रदान करले बा ।
युनिक नेपालसे जेहेन्दार, अतिविपन्न ओ टुहुरा बालबालिकाहुकनके शिक्षा प्राप्तिके लाग युनिक छात्रवृत्ति हरेक साल प्रदान करटी आइल बा । यी वर्षसे भर दीर्घकालिन छात्रवृत्तिके प्रावधान आघे सारल बा ।
कार्यक्रममे सबसे ढेर विद्यार्थीहुक्रे छात्रवृत्ति प्राप्त कैना विद्यालय क्रमशः जनचेतना माध्यमिक विद्यालय, मंगलपुर, अमर शहिद दशरथ चन्द माध्यमिक विद्यालय, राजापुर ओ एकप्रिय राठौर माध्यमिक विद्यालयहे प्रशंसा पत्र समेत प्रदान करल बा ।
ओस्टेक करके, नेपाल स्वयंसेवी रक्तदाता समाजके सदस्य कृष्णथारु मार्फत सम्पूर्ण रक्तदाताहुकनहे प्रशंसा पत्रप्रदान करल रहे । कार्यक्रममे थारु साँस्कृतिक नाच प्रदर्शन कैना तीन समूहहे प्रशंसापत्र सहित सान्त्वना पुरुष्कार रु. ५००० के दरसे प्रदान करल रहे ।
कार्यक्रमके वडका पहुना भूमी सुधार तथा व्यवस्था पूर्व मन्त्री एवं युनिक नेपालके संरक्षक डा. गोपाल दहित छात्रवृत्तिके रकम छोट हुइलेसेफे यी अतिविपन्न तथा टुहुरा बालबालिकाहुकनके शिक्षा आर्जनके लाग यकर महत्वपूर्ण भूमिका खेल्न बटैलै । उहाँ अब्बेक जमाना शिक्षाके जमाना हो ।
शिक्षा नइहुइलेसे आत्म निर्भर बनाई नइसेक्जाई । शिक्षाके लाग अनुशासन, लगनशिलता, मेहनत, धैर्यता मेहनत जरुरत पर्ना बटैलै । छात्रवृत्ति प्राप्त कैना विद्यार्थीहुक्रे अपने उच्च शिक्षा हाशिल करसेकलपाछे अतिविपन्न परिवारके विद्यार्थीहुकनहे छात्रवृत्ति प्रदान कैना जिम्मेवारी बहन कैना आग्रह करलै ।
ओस्टेक करके, कार्यक्रमके समापन करटी युनिक नेपालके अध्यक्ष प्रिमबहादुर थारु युनिक नेपाल सामुदायिक विद्यालयके विद्यार्थीहुकनके शिक्षा आर्जन कैना आर्थिक समस्या बाधा नपुगे ओ जेहेन्दार विद्यार्थीहुकनहे थप प्रोत्साहन होए कहिके शिक्षामे लगानी करटी आइल बटैलै ।
कार्यक्रममे स्वागत मन्तव्य व्यक्त करटी युनिक नेपालके सचिव तथा युनिक छात्रवृत्ति उपसमितिके संयोजक निर्मला चौधरी छात्रवृत्तिके लागि विद्यार्थीहकनके छनौटके आधार ओ प्रक्रियाबारे स्पष्ट पारल रहिट ।
कार्यक्रममे प्रअ हुकनके प्रतिनिधित्व करटी नेपाल राष्ट्रिय माध्यमिक विद्यालयक प्रधानाध्यापक श्यामबहादुर थारु ओ विद्यालय व्यवस्थापन समितिके प्रतिनिधित्व करटी भेरी माध्यमिक विद्यालयके विव्यसके अध्यक्ष रामप्रसाद ढुंगाना शुभकामना मन्तव्य व्यक्त करल रहिट । कार्यक्रमके सञ्चालन युनिक नेपालके कार्यक्रम अधिकृत सोम डेमनडौरा करल रहिट ।
कार्यक्रममे नेपाल राष्ट्रिय माध्यमिक विद्यालयके छात्राहुक्रे स्वागत नाँच प्रस्तूत करल रहिट । युनिक नेपाल सामाजिक उत्तरदायित्व बहन करटी टमान सामाजिक सेवाके क्षेत्रमे योगदान पुगैटी आइल बा । कोरोना महामारीके बेला स्वास्थ्य संस्थाहे स्वास्थ्य सामाग्रीफे सहयोग करटी आइल बा ।
