प्रदेश सरकारके नवनियुक्त मन्त्रीहुक्रे खैलैं सपथ
मन्त्री मण्डल फेर बडल, काँग्रेसहे दुई मन्त्रीसहित एक राज्यमन्त्रीके जिम्मेवारी
पहुरा समाचारदाता
धनगढी, २५ चैत । सुदूरपश्चिम प्रदेशमे नम्मा समयसे प्रतिपक्षक भूमिका निर्वाह करटी आइल काँग्रेसफे प्रदेश सरकारमे सहभागिता जनैले बा । केन्द्रके सत्ता गठबन्धनहे असर पर्ना स्थिति पैदा हुइलपाछे माओवादी केन्द्रसे नेतृत्व करटी आइल प्रदेश सरकारमे काँग्रेसहेफे सहभागी कराइल हो ।
प्रदेश सरकारमे आन्तरिक मामिला तथा कानून मन्त्रालय ओ सामाजिक विकास मन्त्रालयके जिम्मेबारी पैले बा । आन्तरिक मामिला तथा कानून मन्त्री नेपाली काँग्रेसके डा. रणबहादुर रावल ओ सामाजिक विकास मन्त्री गोविन्द बोहोरा पैले बटै ।
ओस्टेक करके सामाजिक विकास मन्त्रालयके राज्यमन्त्री नेपाली काँग्रेसके टेकबहादुर रैका पैले बटै । यिहीसे आघे कानून मन्त्रीमे नेकपा एकिकृत समाजवादीके पूर्णा जोशी ओ सामाजिक विकास मन्त्रीमे नेकपा एकिकृत समाजवादीके लाल बहादुर खडका रहल रहिट ।
सुदूरपश्चिम प्रदेश सरकार गठन हुइल यहोर सामाजिक विकास मन्त्रालयके गोविन्द बोहोरा चौठा मन्त्री हुइट । यिहीसे आघे दिर्घ बहादुर सोडारी, कृष्णराज सुवेदी ओ लालबहादुर खडका मन्त्री रहिट । ओस्टेक आन्तरिक मामिला तथा कानून मन्त्रीमे यिहे आघे प्रकाश शाह, पूर्णा जोशी रहिट ।
यी मन्त्रालयके बोहोरा टिसरा मन्त्री हुइट । ओस्टेक करके तारा लामाके सट्टामे प्रकाश रावलहे आर्थिक मामिला मन्त्री बनाइल बा । उहाँफे यी मन्त्रालयमे टिसरा मन्त्री हुइट ।
सुदूरपश्चिम प्रदेश सरकारमे काँग्रेसके सहभागिता हुइलपाछे आब तीन दलिय मन्त्रीमण्डल बनल बा । प्रदेश सरकारमे नेपाली काँग्रेसके भागमे आन्तरिक मामिला तथा कानून मन्त्रालय ओ सामाजिक विकास मन्त्रालय परल बा । नेकपा माओवादी केन्द्रके भागमे मुख्यमन्त्री तथा मन्त्री परिषदके कार्यालय, उद्योग पर्यटन वन तथा वातावरण मन्त्रालय, भूमि व्यवस्था कृषि तथा सहकारी मन्त्रालय परल बा । ओस्टेक नेकपा एकिकृत समाजवादीके भागमे भौतिक पूर्वाधार विकास मन्त्रालय ओ आर्थिक मामिला मन्त्रालय परल बा ।
प्रदेश सरकारके राज्यमन्त्रीमेफे फेरबडल हुइल बा । जेम्ने भौतिक पूर्वाधार विकास राज्यमन्त्रीसे चुनकुुमारी चौधरी फिर्ता हुइल बटै । एकीकृत समाजबादीके कुलवीर चौधरी नियुक्त हुइल बटै ।
ओस्टेक, भौतिक पूर्वाधार मन्त्रालयके मन्त्रीमे दीर्घ सोडारी ओ भूमि व्यवस्था, कृषि तथा सहकारी मन्त्रालयके मन्त्रीमे बिनिता चौधरी ओ राज्यमन्त्री मानबहादुर सुनार यथावत रहल बटैं ।
अर्थ राज्यमन्त्रीसे माया तामाड बोहरा फिर्ता हुइल बटी कलेसे अमर साउद नियुक्त हुइल बटै । सामाजिक विकास राज्यमन्त्री मनाकुमारी साउदहेफे समाजवादीसे फिर्ता बोलैले बा । हुकान सट्टामे काँग्रेसके टेकबहादुर रैका नियुक्त हुइल बटै ।
प्रदेशसभामे समाजवादीके १४, माओवादीके १३, कांग्रेसके १२, एमाले १० के दश जाने, लोसपाके एक ओ जसपाके एक जाने सांसद बटै । नवनियुक्त मन्त्री ओ राज्यमन्त्रीहुकनहे शुकके रोज सुदूरपश्चिम प्रदेश प्रमुख देवराज जोशी सपथ खवैले बटै ।
