सुदूरपश्चिममे सत्तारुढ गठबन्धनसे बाहिरिना जसपाके चेतावनी
पहुरा समाचारदाता
धनगढी, २६ चैत । सुदूरपश्चिम प्रदेश सरकार पुनर्गठन करल प्रतिजनता समाजवादी पार्टी असन्तु्ष्टि जनैले बा । सत्तारुढ गठबन्धनमे आवद्ध हुइसेफे प्रदेश सरकार पुनर्गठनके क्रममे वाइपास करल कहटी जसपासे आपत्ती जनाइल हो ।
गठबन्धनमे आवद्ध और दलसे अपमान कैना ओ केन्द्रीय सहमतिअनुसार आघे नइबह्रल खण्डमे गठबन्धन बाहिरिना चेतावनी समेत डेले बा । जसपाके प्रदेश समिति अध्यक्ष कृष्णकुमार चौधरी गठबन्धनमे आवद्ध पाँच दलके बैठकमे अपनेहुक्रे स्पष्टसंग बाट राखल हुइलेसेफे वाइपास करल ओरसे यथास्थितीमे गठबन्धन रहे नइसेक्ना बटैलै ।
‘नेपाली कांग्रेस, एकीकृत समाजवादी ओ माओवादी केन्द्र कौनो जानकारी नइडेके कांग्रेसहे प्रदेश सरकारमे सहभागी कराइलमे हमार पार्टीके अपमान करल महसुस हुइल बा,’ धनगढीमे आयोजित पत्रकार सम्मेलनमे चौधरी कहलै, ‘केन्द्रीय सहमतिअनुसार आघे बह्रल खण्डमे केल सहमति हुई सेकी । अन्यथा हम्रे गठबन्धनमे नइबैठबी ।’ जसपासे स्थानीय तहके निर्वाचन समेत ऐक्केली लरना सक्षम हुइल दाबी करले बा ।
