मानवअधिकार मैत्री घोषणापत्रके लाग दलहुकनके ध्यानाकर्षण
पहुरा समाचारदाता
कञ्चनपुर, २७ चैत । अनौपचारिक क्षेत्र सेवा केन्द्र (इन्सेक) सुदूपश्चिम प्रदेशसे कृष्णपुर नगरपालिकाके क्रियाशिल राजनीतिहुकनके मानवअधिकार मैत्री घोषणापत्र बनाई पर्ना ध्यानाकर्षण करैले बा ।
जिम्मेवार निकायहे जवाफदेही बनैना कार्यक्रम अन्तरगत गठित मानवअधिकार समुह ओ इन्सेककर्मी सम्मिलित एक टोली अँटवारके रोज नगर क्षेत्रमे क्रियाशिल राजनितीक पार्टीहुकनहे मानवअधिकार मैत्री घोषणापत्र तयार पारेक लाग ज्ञापनपत्र मार्फत ध्यानाकर्षण कराइल हो । आसन्न स्थानीय तहके निर्वाचनके मिति लग्गे हुइटी रहल बेला निर्वाचनमे भाग लेना राजनीतिक पार्टीहे मानवअधिकार मैत्री घोषणापत्र निर्माण कराइक लाग राजनीतिक दलहुकनहे ज्ञापनपत्र बुझाइल हो ।
मानवअधिकार समुहसे बुझाइल ज्ञापनपत्र बुझ्टी नेपाली कांग्रस कृष्णपुर नगर कमिटीके उपसभापति गजेन्दबहादुर धामी अपन पार्टीसे आसन्न स्थानीय तहके निर्वाचनहे मध्येनजर करके घोषणापत्र तयारी कैना तयारीमे रहल बेला मानवअधिकार समुहसे डेहल ज्ञापनपत्रमे रहल सुझाव महत्वपुर्ण भुमिका खेल्न बटैटी अपन पार्टीके घोषणापत्रमे उल्लेखित सुझावहे समावेश करैना प्रतिबद्धता जनैलै ।
नेकपा (एमाले) कृष्णपुर नगर कमिटि अध्यक्ष गणेश ऐरी मानवअधिकार समुहसे नेकपा (एमाले)से तयार पारे लागल घोषणापत्रहे ध्यानमे धारके उचित समयमेृ उचित सुझाव डेहलमे घन्यवाद डेटी उल्लेखित सुझावहे ने.क.पा.(एमाले)के घोषणापत्रमे समावेश कैना प्रतिवद्धता जनैटी नेकपा (एमाले) कृष्णपुर नगर कमिटीसे अइना वैशाख ९ गते भिटर घोसणापत्रके ड्राफ्ट तयार पारेक लाग पार्टीसे घोषणापत्र तयारी उपसमिति गठन करसेकल जानकारी करैलै ।
नेकपा माओवादी केन्द्रके कृष्णपुर नगर कमिटी अध्यक्ष जोगराज चौधरी राजनीतिक पार्टीहुक्रे स्थानीयतहके निर्वाचनहे मध्येनजर करके तयार पर्ना घोषणापत्रके विषयमे महत्वपुर्ण सुझाव मानवअधिकार समुहसे अपन पार्टीहे डेहलमे धन्यवाद डेटी स्थानीय पार्टी कमिटीके सुझावके आधारमे पार्टी मुख्यालयसे घोषणापत्र तयार पर्ना हुइल ओरसे पालिकास्तरके पार्टी कमिटीसे डेना सुझावमे उल्लेखित सुझावहे समावेश कैना प्रतिवद्धता जनैलै ।
ओस्टेक करके मानवअधिकार समुहसे बुझाइल ज्ञापनपत्र बुझ्टी नेकपा (एकीकृत समाजवादी) कृष्णपुर नगर कमिटीके अध्यक्ष देवानसिंह कार्की सुझाव डेना अपनमे महत्वपूर्ण कार्य हुइलेसेफे अपने डेहल सुझावहे कार्यान्वयन हुइल नइहुइल निरन्तर फलोअप समेत कैना मानवअधिकार समुहहे आग्रह करैलै ।
