बाँसगढीके उपमेयरमे सोमति थारुके दावी

पहुरा समाचारदाता
बाँसगढी, २८ चैत । अइना स्थानीय चुनावमे बर्दियाके बाँसगढी नगरपालिकाके उपमेयरमे नेपाली कांग्रेससे युवा नेतृ सोमति थारु दावी करले बटी ।

नेपाली कांग्रेस बाँसगढी नगर उपसभापति समेत रहल थारु अपन क्षेत्रके जनताके आग्रह ओ सुझावमे उम्मेदवारी दावी करल बटैली । थारु राजनीतिमार्फत सामाजिक रुपान्तरण, समावेशिता, सहभागितामुलक लोकतन्त्र ओ समृद्धि सहितके विकासके लाग अपने महत्वपुर्ण रहल दावी करली ।

अपने उपमेयरमे निर्वाचित हुइलेसे गाउँ टोल ओ समाज करके राष्ट्रके सेवा कैनाफे प्रतिबद्धता करली । शिर्ष नेताहुक्रेफे अपनहे सल्लाह अनुसार आघे बढटी रहल उहाँ दाबी बा । बैशाख ३० गते हुइना स्थानीय चुनाव सभ्य ओ भव्य बनैनामे अपने लागि पर्ना उहाँ बटैली ।

फोरम लोकतान्त्रिकके केन्द्रीय उपसभापति समेत हुसेकल थारु ‘आदिवासी थारु हमरे धर्ती पुत्र“ लगायत थारु भाषामे सयौं गित गासेकल बटी । स्वरके धनी उहाँ थारु समुदायके कला, संस्कृतिहे अपने स्वरसे बचैनामे ढेर योगदान डेले बटी ।

थारु समुदायके गझिन बस्ती बसोबास रहल बाँसगढी बर्दिया नगरपालिका लगायत देशभरके थारु समुदायमे उहाँ लोकप्रिय बटी ।