तेक्वान्दो प्रशिक्षक सिंहहे आर्थिक सहयोग
पहुरा समाचारदाता
धनगढी, ३ बैशाख । लिभर ड्यामेज हुइल तेक्वान्दो प्रशिक्षक शेरहादुर सिंहहे सहयोग करल बा ।
नेपाल तेक्वान्दो संघसे पठाइल सहयोग रकम सुदुरपश्चिम प्रदेश तेक्वान्दो संघसे धनगढीमे प्रशिक्षक सिंहहे सहयोग करल हो । नेपाल तेक्वान्दो संघके सुदुरपश्चिम ईन्चार्ज साम्राज्य विक्रम पाण्डेयके पहलमे पठाईल नगद ५० हजारके चेक प्रशिक्षक सिंहहे सुदूरपश्चिम प्रदेश तेक्वान्दो संघके अध्यक्ष सुवाश शाही हस्तान्तरण करल रहिट ।
लिभर ड्यामेज होके उपचाररत प्रशिक्षक सिंह अब्बे अपने पहलमे उपचार करैटी रहल बाटै । उहाँहे चिकित्सकहुक्रे लिभर ट्रान्स प्लान्ट करे पर्ना सुझाव डेले बाटै । यकर लाग नेपालमे झण्डे ५० लाख ओ भारतमे एक करोड रुपैयाँ लग्ना करल बा । सहयोग रकम हस्तान्तरण कार्यक्रममे प्रशिक्षक सिंह आपनहे सहयोगके आवश्यकता रहल रलेसे फेन अब्बेसम केक्रो फेन आर्थिक सहयोग नैलेहल बटैलै । उहाँ तेक्वान्दो संघसे सहयोग करलपाछे लेहल बटैलै । आब उपचार करक लाग सक्कु रकम अपने तिरे नैसेक्ना हुइलपाछे सहयोगके लाग अपिल करले बाटै ।
‘खेलाडी रहल बेलासे नै ग्यास्टिक ओ अल्सरके समस्या रहे । ढिउर बरस खेलके पचागैल । स्वास्थ्यमे सुरुमे लापरवाही करेबर अब्बे लिभरके अवस्था चौथो स्टेजमे बा । सक्कु ओर चेकजाँच फेन करासेकल बाटुँ,’ तेक्वान्दो प्रशिक्षक सिंह कहलै–‘डाक्टरहुक्रे औषधी खाके नै चोखाइ । मने दश पन्ध्र बरससम बाचे सेकजाइ कले बाटै । उहाँहुक्रे ट्रान्सप्लान्ट करे कहले बाटै । ओत्र रकम मोरठन नैहो । संघरियाहुक्रे सहयोग कैटी रहल बाटै । सक्कु जनहनहे सहयोग करक लाग आव्हान फेन करटुँ ।’
