पहिचानवादी दल एक ठाउँमे

चार दलिय गठबन्धन कैलालीके १२ पालिकामे उम्मेदवारी डेना

पहुरा समाचारदाता
धनगढी, ३ बैशाख । कैलालीमे पहिचानवादी दलबीच अइना स्थानीयतहके निर्वाचनमे चुनावी तालमेल करके आघे बह्रना बटैले बटै ।

थरुहट/थरुवान राष्ट्रिय मोर्चाके नेता लक्ष्मण थारुहे साक्षी रख्टी शनिच्चरके रोज धनगढीमे पत्रकार सम्मेलन करके पहिचानके आन्दोलनरत संघर्ष समितिबीच चुनावी तालमेल कैना घोषणा करल हो ।

सत्ता गठबन्धनसंग रहल जनता समाजवादी पार्टी कैलालीमे गठबन्धन तुरटी और दलहुकनसंग चुनावी तालमेल आघे बढाइल हो । वैशाख ३० गते हुइना स्थानीय तहके निर्वाचने जनता समाजवादी पार्टी, लोकतान्त्रिक समाजवादी पार्टी, नेपाल लोकतान्त्रिक पार्टी ओ संघीय लोकतान्त्रिक राष्ट्रिय मञ्चबीच गठबन्धन कैना निर्णय हुइल जसपा कैलालीके अध्यक्ष ग्याप्रसाद कुश्मी जानकारी डेलै ।

‘हम्रे चार दल केल नाही, रेशम चौधरी गोसिनीयके नेतृत्वमे रहल नागरिक उन्मुक्ति पार्टी लगायत और छोट ओ भारी दलसंगफे चुनावी तालमेल कैबी,’ उहाँ कहलै–‘यी बारे हम्रे छलफल तथा बैठक जारी रख्ले बटी ।’

लक्ष्मण थारु कैलालीके १२ ठो स्थानीय तहमे चार ठो दलके उम्मेदवार रहना बटैलै । उहाँ कहलै–‘थरुहट÷थारुवान राष्ट्रिय मोर्चाके पूर्ण समर्थन, पूर्ण ऐक्यबद्धता ओ यी गठबन्धनहे चुनावमे पठैना, जिटैनामे जोड डेबी ।’ उहाँ आन्दोलनमे उठैटी रहल माग मुद्दाहे सम्बोधन करैना मोर्चाबन्दी करके आघे बढल बटैलै । ‘जसपा सत्ता गठबन्धनमे रहे । आजसे उ पार्टी उ गठबन्धन तुरके आन्दोलनरत दलसंग गठबन्धन करले बा,‘उहाँ कहलै ।

जनता समाजवादी पार्टीके अध्यक्ष कुश्मी धनगढी उपमहानगरपालिका बाहेक जिल्लाके और स्थानीय तहमे और दलसंग गठबन्धन कैना केन्द्रसे काुैनो रोकटोक नइरहल बटैलै । ‘धनगढी उपमहानगरपालिकाके उम्मेदवारके टुङगो ओ चुनावी तालमेलबारे केन्द्रसे करी,’ उहाँ कहलै, ‘और स्थानीय तहमे जिल्लाहे और दलसंग गठबन्धन तुरना वा कैनाबारे कौनो रोक टोक नइहो ।’

जनता समाजवादी पार्टीके केन्द्रीय सदस्य होरीलाल चौधरी सत्ता गठबन्धनमे भारी नेताहुक्रे हावी रहल बटैलै । ‘हमार मागके सुनुवाइ कैना कोइ इच्छुक नइविल्गैना,’ उहाँ कहलै–‘हम्रे केन्द्रीय गठबन्धन काहे मन्ना ?’ उहाँ विगतसे संविधान संशोधन कैना दबाब डेलेसेफे कौनो सुनुवाइ नइहुइल गुनासो व्यक्त करलै ।

संघीय लोकतान्त्रिक राष्ट्रिय मञ्चके उपाध्यक्ष शर्मिला बागचन पहिचान ओ अधिकारके लाग संघर्षरत दल एक ठाउँमे ठरहयाइनाके विकल्प नइहुइलपाछे उ गठबन्धन करल बटैली ।

नेपाल लोकतान्त्रिक पार्टीके केन्द्रीय अध्यक्ष भानुराम थारु गठबन्धनके नीति निर्देशन इमान्दारिताके साथ सक्कु दलके नेता कार्यकर्ताहुकनहे पालना कैना आग्रह करलै ।

चार दलबीच चुनावी तालमेल कैना निर्णय हुइलेसेफे कौन स्थानीय तह ओ वडामे कौन दलके व्यक्तिहे उम्मेदवार बनैना कनाबारे टुङगो लागल नइहो । नेता भानुराम कहलै–‘हम्रे छलफलमे बटी । एक हप्ताभिटर उम्मेदवारहुकनके फे टुङगो लागी ।’