आजसे राष्ट्रिय पुरुष कबड्डी प्रतियोगिता
पहुरा समाचारदाता
धनगढी, ५ वैशाख । धनगढीमे आज (सोम्मारके रोज) से पहिल मुख्यमन्त्री राष्ट्रिय पुरुष कबड्डी प्रतियोगिता सुरु हुइना बा । कैलाली जिल्ला कबड्डी सघंके आयोजनामे हुइना प्रतियोगिता आज (वैशाख ५ से ७ गतेसम हुइक लाग बा । प्रतियोगितामे ८ टिमके सहभागिता रहि ।
यी कबड्डी प्रतियोगिताहे देशमे अभिनसमके भारी धनराशि पुरस्कार रहल आयोजक दाबी करले बा । अँट्वारके रोज पत्रकार सम्मेलन करटि आयोजक कैलाली जिल्ला कबड्डी संघके अध्यक्ष कमलराज पन्त कलैं, “यी आजसमके भारी धनराशिके प्रतियोगिता हो, जोन हम्रे सुदूरपश्चिममे सुरुवात करले बटि ।’
प्रतियोगितामे पहिलहे १ लाख ५० हजार, दुसरहे १ लाख, ओ टिसर हुइल दुई टिमहे ४०/४० हजार रुप्या पुरस्कार डेजाइ । ओस्टेक, उत्कृष्ट खेलाडी (रेडर ओ डिफेन्डर) हे ५ हजार नगदसहित पुरस्कार डेजाइ । प्रतियोगितामे २२ लाख ८६ हजार ६ सय खर्च हुइना आयोजक जनैले बा ।
प्रतियोगितामे प्रदेश नम्बर १ बाहेक ६ ठो प्रदेश, नेपाली सेना ओ सशस्त्र प्रहरी बल कैके ८ ठो टिमके सहभागि हुइटा । प्रतियोगितामे ८ टिमके ८८ खेलाडी, २२ जाने प्रशिक्षक, ६ जाने निर्णायक, १० जाने अफिसियल नेपाल कबड्डी संघके पदाधिकारीहुक्रे, ११ जाने स्वयम्सेवक कैके १ सय ३७ जहनके प्रत्यक्ष सहभागिता रहि ।
आज (सोम्मारके रोज) पहिल खेल गण्डकी प्रदेश ओ नेपाली सेना, डोसर खेल लुम्बिनी प्रदेश ओ सशस्त्र प्रहरी बलबीच हुइना बा ।
प्रतियोगिता लिग कम नकआउट प्रणालीसे खेलाजैना आयोजक जनैले बा । प्रतियोगिताके सुदूरपश्चिम प्रदेशके मुख्यमन्त्री त्रिलोचन भट्ट एक कार्यक्रमके बीच उद्घाटन करना आयोजक जनैले बा ।
