धनगढी–दिपायल द्रुतमार्गके मुख्यमन्त्रीसे अनुगमन
पहुरा समाचारदाता
धनगढी, ६ बैशाख । धनगढी–दिपायल द्रुतमार्ग बनाइक लाग प्रक्रिया सुरु करल डेढ दशकपाछे ट्रयाक खुलल् बा ।
कैलालीके चुरे गाउँपालिका–१ बबैना–ओजेना तीन किलोमिटर सडकखण्डके ट्रयाक खुलल्सँगे खुटिया–दिपायल दु्रतमार्गके ट्रयाक पूरा हुइल हो । धनगढी–दिपायल द्रुतमार्ग निर्माण आयोजना कार्यालयके अनुसार कैलाली ओ डोटी खण्डमे ट्रयाक खोल्ना काम ओराइल बटैटी गाडी सञ्चालनके लाग ग्रेडिङ कैना बाँकी रहल बा ।
कैलाली खण्डमे पर्र्ना बबैना–ओजेनामे तीन किलोमिटरमे ट्रयाक खोल्न काम हुइलसँगे आब ग्रेडिङ कैना कार्य आघे बह्रैना आयोजनाके इञ्जीनियर दिनेश रैखोला जानकारी डेलै ।
विसं २०६४ मे खुटिया–दिपायल द्रुतमार्गके औपचारिकरूपमे सर्भे कैके ट्रयाक खोल्न कार्य सुरु करल हो । उ बेला खुटियासे दिपायलसम ८२ किलोमिटर सडक सर्भे हुइलेसे फेन पाछे कैलालीके स्याउलेसे धनगढीसमके १० किलोमिटर सडक फेन थपके ९२ किलोमिटरके धनगढी–दिपायल द्रुतमार्ग बनैना निर्णय हुइल रहे ।
अब्बे उ सडकके धनगढी–स्याउले खण्डमे कालोपत्र निर्माणके लाग काम सुरु हुइल बा । खड्का कृष्ण नारायणम् जेभीसे भ्याटबाहेक रु १६ करोड ४० लाखमे ठेक्का पाइलपाछे धनगढीके पिपलचौतारासे स्याउलेसमके १३.४ किलोमिटरमे कालोपत्र करक लाग काम सुरु हुइल हो ।
ठेक्का सम्झौताअनुसार धनगढी उपमहानगरपालिका–५ हसनपुरस्थित पिपलचौताराके सामुदायिक प्रहरी कार्यालयसे स्याउलेमे पर्र्ना पूर्वपश्चिम राजमार्गसे कुछ उप्परसम कालोपत्र करजैना इञ्जीनियर रैखोला बटैलै । उहाँ गत आर्थिक बरसके असार २० गते अइना ३० महिनामे कालोपत्र कैसेक्ना मेरके ठेक्का सम्झौता हुइल बटैलै ।
धनगढी–दिपायल द्रुतमार्ग आयोजना कार्यालयके अनुसार चालु आवमे धनगढीसे १३।४ किलोमिटर ओ डोटीके दिपायलसे ९.५ किलोमिटर सडकमे कालोपत्र कैना सम्झौता हुइल आयोजना कार्यालय जनैले बा । आयोजनाके इञ्जीनियर रैखोलाके अनुसार धनगढी–स्याउ सडकखण्ड कालोपत्रके लाग अब्बे उ सडकखण्डके दायाँबायाँ डुनु ओर नाली निर्माण कैके सडकके तह मिलैना काम हुइटी रहल बा ।
ओस्टके सुदूरपश्चिमके मुख्यमन्त्री चिलोचन भट्ट सोम्मारके उ सडकखण्डके स्थलगत अनुगमन करले बाटै । अनुगमनके क्रममे उ दु्रतमार्गके ट्रयाक खोल्न काम सम्पन्न हुइलपाछे थप स्त्तरोन्नतिके कार्य गति लेना उहाँ बटैलै ।
