पर्यटकनके लाग सानडार कुइलहुवा
सागर कुस्मी
धनगढी, ७ बैशाख । कैलाली जिल्ला प्राकृतिक सम्पदासे भरल ठाउँ हो । ओहे मन्से कैलालीके कुइलहुवा टलुवा फेन आन्तरिक पर्यटकनके लाग खास गन्तव्य फेन हो ।
कैलारी गाउँपालिका वडा नम्बर ९ मे रहल उ टलुवा रोजाना संयौं आन्तरिक पर्यटक ओइनके भिरभार रहठ । अपन अपन परिवारलेके स्थानीय, विद्यार्थी, व्यापारी, कर्मचारी, पत्रकार ओ साहित्यकार लगायत घुमे ओ राहरंगी करे अउइयन कुइलहुवा टलुवा पुगटि बटैं ।
पहिलेकसे अझकल पर्यटक ओइने हरडम घुमे आइल मनैं टलुवा हेरके सबके मन बहला जैठिन । रोज मनैनके आइठ डेख्के गाउँक् मनैं फेन अचम्म लागे लागल बटिन । ओहेमारे गाउँहिक् मनैं पर्यटक ओइने अइटि रहल ओरसे डोकान व्यवसाय मजा चले भिंरल स्थानीय लक्ष्मी राना बटैलैं ।
कुइलहुवा टलुवा घुमे आइल कंचनपुरके साहित्यकार वीरबहादुर राजवंशी मनके बोझ उटरल महसुस करल बटैलैं । आँजर पाँजर बनुवाँ रहल ओरसे इ टलुवा प्राकृतिक सौन्दर्यसे भरिभराउ बा उहाँ कहलैं–कैलालीमे घुमक् लाग अइसिन फेन ठाउँ बा कहिके महि पटे नैरहे ।
लाउमे बैठके सयर करे मिलना ओ बनभोज खाइक लाग कैलालीके टमान ठाउँ ओ बाहेर जिल्लासे फेन आन्तरिक पर्यटक आइटी रहल उ टलुवा व्यवस्थापन समिति पहुरा दैनिकहे जानकारी कराइल । समिति लाउमे बैठके सयरके लाग प्रतिव्यक्ति २५ रुपिया टिकट लेहल बटागैल बा । २५ रुपिया टिरके पर्यटक लोग आधा घण्टासम मन बहलाइ सेक्ठैं ।
पर्यटकनहे गाइड कर्ना ओ शुल्क उठाइक लाग पाँचजे स्थानीय युवा जागिर पैले बटैं । मने एकफाले बरा ढेर पर्यटक अइलेसे व्यवस्थापन करना कठिन हुइल आयोजक लोग बटैठैं । आन्तरिक पर्यटकनके लाग मजा गन्तव्य बनल कुइलहुवा टलुवा पर्यटन गन्तव्य बनल बाड गाउँबासी खुशी हुइल बटैं ।
चुक्की खउइयनसे समिति एक जहनसे १० रुपिया लेहठ । व्यावसायिक रुपमे मच्छी पालके कुइलहुवा टलुवामे स्थानीयस्तरमे आयस्रोतके डगर बनल बा । गाउँ–गाउँसे उ टलुवा क्षेत्रमे चुक्की खउइयनके भरि एकदम रहठ ।
टलुवासे हुइल आम्दानी स्थानीयस्तरमे विकास निर्माण ओ कर्मचारीनके तलबमे खर्च हुइटि रहल टलुवा व्यवस्थापन समितिके अध्यक्ष सिहिलाल चौधरी बटैलैं । पर्यटकनसे सङ्कलन हुइल रुपिया अइना दिनमे थप पर्यटन पूर्वाधार निर्माण कैना योजना बनैटि रहल उहाँ बटैलैं । लाउ, पिनापानी अभिल मजा व्यवस्थापन नैहुइल ओरसे अइना दिनमे आउर मजा व्यवस्थापन कैना उहाँ बटैलैं ।
स्थानीय लक्ष्मी रानाके अन्सार अझकल रोज लावा लावा मनैन टलुवा घुमे आइल बिलगैठैं । राष्ट्रपति चुरे तराई मधेस संरक्षण विकास समिति अन्तर्गतके ताल तलैया विकास कार्यक्रम अन्तर्गत नेपाली सेना टलुवाके व्यवस्थापन कैडेले बा । ९७ लाख ७४ हजार रुपिया लगाके पर्यटन पूर्वाधार तथा डगर मजा गराबिल हुइल बा ।
७२ हेक्टर क्षेत्रफलमे फैलल कुइलहुवा टलुवा सिचाइँके लाग फेन पानी स्थानीस्य किसान लोग बेल्सटी आइल बटैं । उ टलुवक् पानी पाँच गाउँक किसान खेटीपाटी सिचाइँमे काम लगैठैं ।
