लागूऔषधसहित पाँच पक्राउ

पहुरा समाचारदाता
धनगढी, ७ वैशाख । कैलालीके टीकापुरसे लागुऔषधसहित पाँच जाने पक्राउ परल बाटै । टीकापुर नगरपालिका–९, खक्रौलास्थित नेपाल भारत सिमानाकामे रहल प्रहरी चेक पोष्ट लग्गेक सडक खण्डमे प्रहरी चौकी कालाकुण्डासे खटल प्रहरी टोली उहाँहुक्रनहे पक्राउ करल हो । पक्राउ परुइयामे एक जाने भारतीय नागरिक पक्राउ परल बाटै ।

ईलाका प्रहरी कार्यालय टीकापुरके अनुसार पक्राउ परुइयामे टीकापुर नगरपालिका–९ कर्मीडाँडाके १९ वर्षीय कुलराम कना कबिर चौधरी, खक्रौला बैठुइया २३ वर्षीय प्रकाश बिक ओ बाजुरा जिल्ला स्वामीकार्तिक खापर गाउँपालिका–५ जेरा घर रहल हाल टीकापुर नगरपालिका–१ ब्लक नम्बर १३ बैठुइया १८ वर्षीय रोहन सिंह रहल बाटै ।

ओस्टके टीकापुर वडा नम्बर ९ पायलगाउँ बैठुइया १९ वर्षीय रिगल कना रमेश साउँद ओ भारतके लखिमपुर खिरी ग्राम पञ्चालयत ईन्द्रनगर गाउँ पोष्ट सुरतनगरके १८ वर्षीय हरप्रित सिंह सरदारहे प्रहरी पक्राउ करल हो । उहाँहुक्रनठनसे नेट्राभेट ट्याबलेट १३० थान, स्पास ट्याबलेट ९ थान ओ दुई ग्राम चरेश बरामद हुइल प्रहरी जनैले बा ।