कैलालीके सक्कु पालिकामे निर्वाचन अधिकृतके कार्यालय उद्घाटन

पहुरा समाचारदाता
धनगढी, ८ बैशाख । कैलालीके धनगढीसहित १३ स्थानीय तहमे मुख्य निर्वाचन अधिकृत तथा निर्वाचन अधिकृतके कार्यालयके उद्घाटन कैगिल बा । अइना वैशाख ३० गते हुई लागल स्थानीय तहके निर्वाचनहे व्यवस्थापन कैना धनगढीके प्रदेश स्वास्थ्य तालिम निर्देशनालयमे मुख्य निर्वाचन अधिकृतके कार्यालय ओ १२ स्थानीय तहके केन्द्रमे निर्वाचन अधिकृतके कार्यालयके उद्घाटन करल हो ।

धनगढीस्थित मुख्य निर्वाचन अधिकृतके कार्यालयके मुख्य निर्वाचन अधिकृत जयानन्द पनेरु व्यानर खोलके ओ पढके समुदघाटन करले रहिट कलेसे निर्वाचन अधिकृतके कार्यालयके सम्बन्धित स्थानीय तहके निर्वाचन अधिकृतहुक्रे समुदघाटन करले रहिट । कार्यालयके समुदघाटन करटी मुख्य निर्वाचन अधिकृत पनेरु निर्वाचन कार्यतालिकाके प्रारम्भ हुइल घोषणा करले रहिट । ‘मुख्य निर्वाचन अधिकृत तोक्न काम चैत २७ गते हुसेकल रहे ।

आब कार्यालय उद्घाटन हुइलपाछे निर्वाचन कार्यतालिका अनुसार निर्वाचनके कार्यके प्रारम्भ हुई’ उहाँ कहलै –‘वैशाख ११ ओ १२ गते मनोनयन दर्ताके कार्यतालिका रहल ओरसे उहे अनुसार कार्यालयमे हम्रे उहीहे व्यवस्थित, मर्यादित बनैना तयारी कैबी ।’ उहाँ निर्वाचनहे भव्य, सभ्य, भयरहित, मर्यादित बनैना राजनीतिक दल, सञ्चारकर्मी, अधिकारकर्मी, पर्यवेक्षक सुरक्षाकर्मीहुकनके मुख्य भुमिका रहल बटैलै ।

‘सक्कुहुनके आ–अपन आचारसंहिता रहल बटै’ उहाँ कहलै–‘उ आचारसंहिताके पालना करके आघे बह्रेबेर निर्वाचनहे व्यवस्थापन ओ मजा बनैना निर्वाचन अधिकृतहुकनहे सहज हुइना बा ।’ कार्यालय उद्घाटन समारोहमे कैलाली प्रमुख जिल्ला अधिकारी किरण थापा लगायत सुरक्षा निकायके प्रमुखहुकनके सहभागिता रहल रहे । अइना ३० (बैशाख) के लाग निर्धारित स्थानीय तह निर्वाचन व्यवस्थापन कैना आयोगसे बिफेसे कैलालीसहित देशभरी जिल्ला निर्वाचन कार्यालय सञ्चालनमे नानल जनाइल बा ।

निर्वाचन आयोगसे कुछ समयआघे जिल्ला न्यायाधीशहे मुख्य निर्वाचन अधिकृतमे नियुक्ति करल रहे । यि संगे सक्कु स्थानीय तहमे निर्वाचन अधिकृत तोक्के सम्बन्धित तहमे खटा सेकल बा ।