एपिएफहे पुलिसके चुनौती

पहुरा समाचारदाता
धनगढी, ९ वैशाख । कैलालीके धनगढीमे जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताके उपाधिके लाग विभागीय टोली एपिएफक्लब ओ नेपाल पुलिस क्लब काल्ह (शनिच्चरके रोज) भिरटैं । धनगढी रंगशालामे काल्ह साँझ हुइना फाईनलमे दुनु टोली उपाधिके लाग भिरटैं ।

वनदेवी युवा क्लबके आयोजनाके वैशाख ३ गतेसे सुरु हुइल प्रतियोगिताके उपाधि जिटेक लाग दुनु टीम दाबी करले बटैं । शुक्रके रोज धनगढी रंगशालामे हुइल प्रिम्याच कन्फ्रेन्समे फाईन लिष्ट दुनु टोलीके कप्तान ओ प्रशिक्षक उपाधि जिटना दावी करले बटैं । उत्कृष्ट लयमे रहल एपिएफके कप्तान अनिता बस्नेत फाईनल जिटेक लाग खेल्न बटैलि । उहाँ रातके समयमे खेल्लेसे कुछ कठिनाई हुइलेसे फेन उपाधि अपन टीम जिटना दावी करलि ।

“पहिलचो लाईटमे खेलेबेर समस्या हुइल बा । कौनो बेलालाईट विगरके खेलके रिदम विग्रना समस्या बा,” कप्तान बस्नेत कलि, “सात वर्षपाछे फाईनल पुगल बटि । महिला गोल्डपक पहिलचो हुइल ओरसे हम्रिहिनहे उत्साहित बनैले बा । हम्रे च्याम्पीयन होब । ओहे हिसाबसे तयारी बा ।” एपिएफएके प्रशिक्षक जनकसिंह थारु फेन जिटेक लाग खेल्न बटैलैं । ‘लिगमे फेन लगातार जिटले बटि । नकआउट प्रतियोगिता फेन जिटब,” प्रशिक्षक थारु कलैं, “हम्रे पुलिसहे हटैटि आइल बटि । फन हटाब उपाधि जिटब ।” एपिएफल सेमिफाईनलमे आर्मीहे ३–२ से हटैले रहे कलेसे क्वाटरफाईनलमे विराटनगर महानगरपालिकाहे ८–० के चाकल अन्तरसे हटैले रहे ।

नेपाल पुलिस क्लब फेन उपाधि जिट्ना दावी करले बा । लम्मा समयपाछे प्रतियोगिताहुक्रे फाईनलमे पुगल ओरसे ओहे अवसरहे मौकामे बदल्न पुलिसके दावी बा । पुलिसके कप्तान घिमकुमारी गुरुङ फेन जिटेक लाग खेल्न बटैलि । “जिटेक लाग खेलब । सब जाने ओहेअनुसार तयारी करले बटि,” कप्तान गुरुङ कसल, “लाईटमे नयाँ अनुभव लेहटि । रमाईलो फेन हुइटा । दिनके खेल्ेसे गर्मी हुइट । रातके सहजिल फेन हुइल बा ।”

पुलिसके प्रशिक्षक संजीव जोशी फेन जिटके लाग फाईनल खेल्न बटैलैं । “ढेर वर्षपाछे फाईनल पुगल बटि । जिटेक लाग खेलब,” प्रशिक्षक जोशी कलैं, “मैदानमे कुछ समस्या बा । बलहे चाहल अनुसार खेलैना गाह्रो हुइटा । नयाँ फर्मेन्स अनुसार टीम फेन प्रगति पाइले बा । मजा नतिजा आइ ।” पुलिस सेमिफाईनलमे आयोजक वनदेवी युवा क्लबहे ३–० के अन्तरसे हटैले रहे कलेसे क्वाटर फाईनलमे चन्द्र्रपुर नगरपालिकाहे १–० ले हटैले रहे ।

शनिच्चरके धनगढी रंगशालामे हुइना गोल्डकपके विजेता ट्रफीसहित नगद ५ लाख ओ उपविजेता ट्रफीसहित २ लाख ५० हजार रुपैयाँ पुरस्कार राशि प्राप्त करहि ।

प्रतियोगितामे म्यान अफ दी म्याचहे ५ हजार, ओस्टेक टमान विधाके उत्कृष्ट खेलाडीहे १० हजार ओ प्रतियोगिता भर उत्कृष्ट हुइना खेलाडी नगद ५० हजार रुपैयाँ प्राप्त करना आयोजक क्लबके अध्यक्ष सुसन जोशी बटैलैं ।

धनगढीमे दिनके अत्यधिक गर्मी हुइना हुइल ओरसे पहिलचो रात्रि कालीन प्रतियोगिता आयोजना करल हो । प्रतियोगिताके मुख्य प्रवद्र्धकमे सुदूरपश्चिम प्रदेश खेलकुद परिषद रहल बा ।