घोडाघोडी नगरपालिकाके मेयर चौधरीसे राजीनामा

पहुरा समाचारदाता
सुख्खड, ९ वैशाख । कैलालीके घोडाघोडी नगरपालिकाके मेयर ममताप्रसाद चौधरी पदसे राजीनामा डेले बाटै । वैशाख ३० गते हुइना स्थानीय तहके निर्वाचनमे पुनः मेयरमे उम्मेदवारी डेना कहटी चौधरी उपप्रमुख प्रेमकुुमारी थापाहे राजीनामा बुुझाइल हुइट ।

‘निर्वाचन आचारसंहिता लागुु हुइल कारण कामकाज करे नैसेक्ना अवस्था ओ अगामी निर्वाचनमे पुुनः उम्मेदवार बन्ना आकांक्षा रहल ओरसे पदसे राजीनामा डेहल हुइटुुँ,’ चौधरी कहलै । नेकपा एमाले कैलालीके उपसचिवसमेत रहल चौधरी २०७४ सालमे हुइल निर्वाचनमे घोडाघोडी नगरपालिकाके मेयरमे विजयी हुइल रहिट ।

चौधरी माओवादी केन्द्रके लक्ष्मण चौधरीहे पराजीत करल रहिट । ओस्टके पुुनः दोहरिना कहटी नेकपा एमालेसे निर्वाचित घोडाघोडी नगरपालिका–१ के वडाध्यक्ष मनराज शाही, ५ के वडाध्यक्ष प्रेम रोकाया, ९ के वडाध्यक्ष कृष्ण शाह समेत पदसे राजीनामा डेले बाटै । ओस्टके नेपाली कांग्रेससे विजयी वडा नम्बर ८ के अध्यक्ष भीम बोगटी फेन राजीनामा डेले बाटै ।