चुरे गाउँपालिकाके अध्यक्षमे एमाले निर्वाचित

पहुरा समाचारदाता
धनगढी, २ जेठ । कैलालीके चुरे गाउँपालिकामे नेकपा एमालेके उम्मेदवार विजयी हुइल बटैं । सत्तारुढ पाँच दलके समर्थन पाइल नेकपा एकीकृत समाजवादीके उम्मेदवारहे पराजित करटि नेकपा एमालेके चक्रबहादुर बोगटी निर्वाचित हुइल बटैं ।

बोगटी तीन हजार ३०५ मत पैलैं कलेसे निकटतम प्रतिद्वन्द्वी नेकपा एकीकृत समाजवादीके लोकबहादुर सारुमगर तीन हजार २८१ मत पैले बटैं ।

गाउँपालिकाके उपाध्यक्षमे भर गठबन्धनओरसे नेपाली काँग्रेसके धना थापा निर्वाचित हुइल बटि । थापा तीन हजार ४४९ मत नान्के विजयी हुइल बटि । उहाँक प्रतिद्वन्द्वी एमालेके दीपादेवी साउँद तीन हजार १२१ मत पैले बटि ।

ओस्टेक छ ठो वडा रहल यी गाउँपालिकामे वडा नम्बर १ मे नेपाली काँग्रेससे वडाध्यक्ष ओ अन्य सक्कु वडामे नेकपा एमालेके वडाध्यक्ष विजयी हुइल बटैं ।