सुख्खाबन्दरगाह ओ औद्योगिक क्षेत्र सरकारके प्राथमिकतामेः मन्त्री बडू
कञ्चनपुुर, २ जेठ । उद्योग, वाणिज्य तथा आपूर्तिमन्त्री दीलेन्द्रप्रसाद बडू सुख्खाबन्दरगाह ओ औद्योगिक क्षेत्रके निर्माण सरकारके उच्च प्राथमिकतामे रहल बटैले बाटै ।
उद्योग, वाणिज्य तथा आपूर्ति मन्त्रालयसे सोम्मारके कञ्चनपुरके महेन्द्रनगरमे आयोजना करल पत्रकार सम्मेलनमे मन्त्री बडू कञ्चनपुरमे प्रस्तावित दोधारा चादँनी सुख्खाबन्दरगाह ओ दैजी औद्योगिक क्षेत्रके निर्माणहे आघे बह्र्रैना पहल कैटी रहल बटैलै ।
“लम्मा समयसे प्रस्ताव ओ शिलान्यास कैलेसे फेन बजेटके व्यवस्थापन अब्बेसम नैहो”, उहाँ कहलै,“आगामी आर्थिक बरसके बजेटमार्फत इ दुई आयोजनाहे समेटजैना बा ।” दोधारा चादँनीके सुख्खाबन्दरगाह ओ दैजी औद्योगिक क्षेत्रके मन्त्री बडूसँगे पूर्वमन्त्री रमेश लेखक, नारायाणप्रकाश साउद, उद्योग सचिव गणेशप्रसाद पाण्डेय स्थलगत अनुगमनसमेत करल रहिट ।
मन्त्री बडू सुख्खाबन्दरगाह निर्माण भारतके समेत प्राथमिकतामे रहल बटैलै । “ इ नेपाल–भारत ओ चीनके त्रिदेशीय व्यापारिक महत्वसे जोरल योजना फेन हो”, मन्त्री बडू कहलै, “इ योजना सम्पन्न हुइल औद्योगिक क्षेत्रमे मुलुक फड्को मारी ।”
ओस्टके दैजी औद्योगिक क्षेत्रके निर्माण होसेकलपाछे २२ हजार नागरिक रोजगारी पैना उहाँ बटैलै । “औद्योगिक क्षेत्रके निर्माणहे कैसिक सम्पन्न कैना कना बारेम मन्त्रालय हाली टुङ्गोमे पुग्ना बा”, उहाँ कहलै, “औद्योगिक क्षेत्रके निर्माण आब दु्रतगतिमे आघे बह्री”, कार्यक्रममे बोल्टी उद्योग मन्त्रालयके सहसचिव नारायण रेग्मी सुख्खाबन्दरगाहके निर्माणके लाग पहिल चरणमे रु सात अर्ब लग्ना अनुमान करल बटैलै ।
“वातावरणीय प्रभाव मूल्याङ्कन ओ जग्गा भोगाधिकारके विषय टुङ्गो लग्ना चरणमे बा”, उहाँ कहलै, “प्रक्रियामे रहल विषय ओ नयाँ बजेटमे सुख्खाबन्दरगाहहे सम्बोधन हुइना विषय एकसाथ टुङ्गोमे पुगेसेकी ।”
