कैलारीके ४ वडामे नेपाली काँग्रेसके प्यानल विजयी

गाउँपालिका अध्यक्ष पदमेफे नेपाली काँग्रेसके अग्रता

पहुरा समाचारदाता
हसुलिया, २ जेठ । कैलाली जिल्लाके कैलारी गाउँपालिकामे स्थानीय तह निर्वाचननमे अभिनसम ४ ठो वडामे नेपाली काँग्रेस प्यानल सहित विजयी हुइल बा । कलेसे जारी मतगणनामे गाउँपालिका अध्यक्ष पदमे अग्रता डेखल बा ।

कैलारी गाउँपालिकाके वडा नम्बर १, २, ३ ओ ४ मे नेपाली काँग्रेसके प्यानल विजयी हुइल बा । कैलारी गाउँपालिका वडा नम्बर १ के अध्यक्षमे धोज हरिपाल बोहारा १११५ मत नानके विजयी हुइल बटै । हुकान प्रतिद्वन्दी नेकपा माओवादी केन्द्रके बालकृष्ण डगौराथारु ६६० मत पैलै ।

ओस्टेक नेपाली काँग्रेसके वडा सदस्य तुलसी प्रसाद चौधरी ९९४, शिकारी चौधरी ९७९, महिला सदस्य लिलापतिदेवी चौधरी १०४६ ओ दलित महिला सदस्य पुष्पा भुल १०३१ मत पाके विजयी हुइल बटै । वडा नम्बर १ मे मतदाता संख्या ३ हजार ७७५ रहलमे २ हजार ८९२ परल रहे । ओम्नेसे २५ सय ४९ मत सदर ओ ३४३ मत बदर हुइल निर्वाचन अधिकृतके कार्यालय कैलारी गाउँपालिका जनैले बा ।

कैलारी गाउँपालिका वडा नम्बर २ के अध्यक्षमे नेपाली काँग्रेसके विकास चौधरी १०४० मत पाके विजयी हुइल बटै । हुकान प्रतिद्वन्दी नेकपा माओवादी केन्द्रके दयाशंकर चौधरी ८५६ मत केल पैलै । ओस्टेक नेपाली काँग्रेसके वडा सदस्यमे सन्तराम चौधरी ९९७, आशिक चौधरी ९०८, महिला सदस्यमे रजकलादेवी खनाल ९०७, टिकाकुमारी चौधरी ९२८ मत पाके विजयी हुइल बटै । वडा नम्बर २ मे मतदाता संख्या ३९ सय ७३ रहलमे ३ हजार ४९ मत परल रहे । ओम्नेसे २८ सय १६ मत सदर ओ २३३ मत बदर हुइल निर्वाचन अधिकृतके कार्यालय कैलारी गाउँपालिका जनैले बा ।

कैलारी गाउँपालिका वडा नम्बर ३ के अध्यक्षमे नेपाली काँग्रेसके सन्तराम चौधरी १०१२ मत पाके विजयी हुइल बटै । हुकान प्रतिद्वन्दी नेकपा माओवादी केन्द्रके कैलाश चौधरी ७७३ मत केल प्राप्त कैले बटै । ओस्टेक नेपाली काँग्रेसके वडा सदस्यमे किसुनलाल चौधरी १००१, सैतुराम चौधरी ९६१, महिला सदस्य शकुन्तला बखरिया १००४, नेकपा माओवादी केन्द्रके पार्वती विक ७५९ मत पाके विजयी हुइल बटै । वडा नम्बर ३ मे नेपाली काँग्रेसके ओरसे दलित महिला सदस्य उम्मेदवार नइरहल पार्वतीहे नानल हो ।

वडा नम्बर ३ मे ३४ सय ४५ मतदाता संख्या रहलमे २७ सय ९८ मत परल रहे । ओम्नसे २५ सय ६४ मत सदर ओ २३४ मत बदर हुइल निर्वाचन अधिकृतके कार्यालय जनैले बा ।

ओस्टेक करके कैलारी गाउँपालिका वडा नम्बर ४ के अध्यक्षमे नेपाली काँग्रेसके ठागुराम चौधरी ८५४ मत पाके विजयी हुइल बटै । हुकान प्रतिद्वन्दी स्वतन्त्र उम्मेदवार देवनानारायण चौधरी ३८४ मत केल प्राप्त कैले बटै । ओस्टेक नेपाली काँग्रेसके वडा सदस्यमे हरिद्वारी चौधरी ९२२, मोहनलाल चौधरी ९११, महिला सदस्य लक्ष्मीकुमारी चौधरी ९१०, दलित महिला सदस्य सुवा परियार ९२६ मत पाके विजय हुइल बटै । वडा नम्बर ४ मे निवर्तमान अध्यक्ष भिखराम चौधरी टिकट नइपाइलपाछे स्वतन्त्रसे लारेबेर २७३ मत पैले रहिट । उहाँ अघिल्का चुनावमे नेपाली काँग्रेससे टिकट पाके विजयी हुइल रहिट । अप्खी वार भर टिकट नइपाइलपाछे भुइकटहर चुनाव चिन्ह लेके स्वतन्त्रसे लरल रहिट । ओस्टेक अध्यक्षके प्रतिद्वन्दी स्वतन्त्र उम्मेदवार देवनानारायण चौधरीहे नेकपा माओवादीके समर्थन रहे ।

वडा नम्बर ४ मे मतदाता संख्या ३३ सय ८८ रहलमे २४४६ मत परल रहे । ओम्नेसे १९ सय ७५ मत सदर ओ ४७१ मत बदर हुइल बा । नौ वडा रहल यी गाउँपालिकामे १ से ४ वडा समके मतदाता संख्या १४ हजार ५ सय ८१ रहलमे ११ हजार १८५ मत परल रहे । यम्ने ९ हजार ९०४ मत सदर ओ १ हजार २८१ मत बदर हुइल निर्वाचन अधिकृतके कार्यालय कैलारी गाउँपालिका जनैले बा ।

नौ वडा रहल कैलारी गाउँपालिकाके १,२,३ ओ ४ वडाके मतदाता संख्या १४ हजार ५८१ रहलमे ११ हजार १८५ मत परल रहे । जेम्नेसे ९ हजार ९०४ मत बदर ओ १ हजार २८१ मत बदर हुइल निर्वाचन अधिकृतके कार्यालय कैलारी गाउँपालिका जनैले बा ।

वडा नम्बर १ से ४ समके मत गणनाके परिणाम अनुसार रुख चुनाव चिन्ह लेके निर्वाचन लरल नेपाली काँग्रेसके राजसमझ चौधरी ३८ सय ४६, उपाध्यक्ष भगवतीकुमारी चौधरी ३७ सय ९४ मत पैले बटै ।

प्रतिद्धन्दी हलो चिन्ह लेके चुनाव लरल राप्रपा नेपालके उम्मेदवार होम बहादुर गुरुङ २९ सय ४६ ओ उपाध्यक्ष पिङला थारु २४ सय ८९ मत पैले बटै । ओस्टेक निवर्तमान गाउँपालिका अध्यक्ष लाजुराम चौधरी २३ सय ५६ ओ निवर्तमान उपाध्यक्ष लक्ष्मी सत्गौवा २४ सय ९६ मत केल पैले बटै ।

ओस्टेक समाचार तयार करटी बेर गणनाके अपडेट (१२५१) मे कैलारी गाउँपालिका वडा नम्बर ५ के वडा अध्यक्ष पदके उम्मेदवार नेपाली काँग्रेसके विष्णु प्रसाद चौधरी ५१८ मत पैले रहिट । हुकहिनहे नेकपा माओवादी केन्द्रके लालतु राम चौधरी २७६ मत पैले रहिट । हलो चुनाव नविनकुमार चौधरी २३८ मत पैले बटै ।

यहाँसम पुगेबेर नेपाली काँग्रेसके राजसमझ चौधरी ४२ सय ७२, उपाध्यक्ष भगवती कुमारी चौधरी, राप्रपाके होमगुरुङ ३३ सय, उपाध्यक्ष पिङला थारु २८ सय १, नेकपा माओवादी केन्द्रके लाजुराम चौधरी २६ सय ९, उपाध्यक्ष लक्ष्मी सत्गौवा २७ सय ४० मत पैले बटी । वडा नम्बर ५ मे ३७ सय २९ मत परल बा । मत गणना जारी बा ।