नेपाली काँग्रेसके विष्णुप्रसाद चौधरीहे फेनसे वडा हँक्ना जिम्मेवारी
पहुरा समाचारदाता
धनगढी, ३ जेठ । कैलालीके कैलारी गाउँपालिका वडा नम्बर ५ मे नेपाली काँग्रेसके अध्यक्षके उम्मेदवार विष्णुप्रसाद चौधरी आपन प्यानल सहित विजयी हुइल बाटै । इ सँगे उहाँहे स्थानीयहुक्रे फेनसे वडा हँक्ना जिम्मेवारी पाइल हुइट ।
उहाँ १५५३ मत लानके विजयी हुइल हुइट । कलेसे ओहकान प्रतिद्वन्द्वी नेकपा माओवादी केन्द्रके वडा अध्यक्षके उम्मेदवार लाल्टु चौधरी ८२२ मत लानल रहिट । वडा सदस्यमे क्रमशः भागुदास चौधरी(१४५९), मानबहादुर चौधरी(१५४७), अनारकली चौधरी(१४४८) ओ पवित्रा परियार(१४९८) मत लानके विजयी हुइल बाटै ।
इहीसे आघे नेपाली काँग्रेससे वडा नम्बर १ मे धोजहरिपाल बोहरा, २ मे विकास चौधरी, ३ मे सन्तराम चौधरी ओ वडा नम्बर ४ मे ठागुराम चौधरी आपन प्यानल सहित विजयी हुइल बाटै ।
यहोर वडा नम्बर १ से ५ सम हुइल मतगणनाके परिणाममे काँग्रेस ओरसे गाउँपालिका अध्यक्षके उम्मेदवार राजसमझ चौधरी ५२०७ मत प्राप्त कैके पहिल, राप्रकाके उम्मेदवार होमबहादुर गुरुङ ३८८६ मत लानके डुसरा ओ नेकपा (माओवादी केन्द्र) के लाजुराम चौधरी ३०८५ मत प्राप्त कैके टिसरा स्थानमे रहल बाटै ।
उपाध्यक्ष ओरसे काँग्रेसके भगवती चौधरी ५२१२ मत, राप्रापाके पिंगला थारु ३३२९ ओ माओवादी केन्द्रके लक्ष्मी सत्गौवा थारु ३१९२ मत प्राप्त करले बाटी ।
