धनगढी सुपर लिगके खेल तालिका सार्वजनिक

पहुरा समाचारदाता
धनगढी, ३ जेठ । क्लब स्तरीय क्रिकेट प्रतियोगिता ‘धनगढी सुपर लिग’ के खेल तालिका सार्वजनिक हुइल बा ।

लिटल फ्लावर स्पोर्ट्स एन्ड इभेन्ट्स प्रालि धनगढीसे खेल तालिका सार्वजनिक करल हो । सुदूरपश्चिम प्रदेश प्रहरी कार्यालयके खेलमैदानमे सञ्चालन हुइना प्रतियोगिता जेठ ६ गतेसे १४ गतेसम हुइना बा ।

सार्वजनिक खेल तालिका अनुसार पहिल दिन दुई खेल हुइना बावै । पहिल खेलमे लिटल फ्लावर क्रिकेट क्लब ओ धनगढी क्रिकेट एकेडेमीबीच प्रतिस्पर्धा हुइना बा ।

डुसरा खेलमे बुङगल क्रिकेट क्लब ओ कैलाली जिल्ला क्रिकेट क्लबबीच प्रतिस्पर्धा हुइना बा ।

प्रतियोगितामे देशके टमान ६ ठो क्लब बुङगल क्रिकेट क्लब बझाङ, देउखुरी वारियर्स दाङ, धनगढी क्रिकेट एकेडेमी धनगढी कैलाली, महेन्द्रनगर क्रिकेट एकेडेमी महेन्द्रनगर कञ्चनपुर, लिटल फ्लावर क्रिकेट क्लब धनगढी कैलाली ओ कैलाली जिल्ला क्रिकेट क्लब धनगढी कैलालीके सहभागिता रहना बा ।

टी–ट्वान्टी फर्म्याटमे सञ्चालन हुइना प्रतियोगिताके विजेता नगद २ लाख उपविजेता १ लाख नगद तथा ट्रफी, मेडल ओ प्रमाणपत्र प्राप्त कैना बाटै । सर्वोत्कृष्ट खेलाडी नगद १५ हजार, उत्कृष्ट बलर, ब्याट्सम्यान तथा उदयमान खेलाडी ७ हजार ५ सय नगद पुरस्कारके साथे ट्रफी, मेडल ओ प्रमाणपत्र प्राप्त कैना बाटै ।

प्रत्येक खेलके म्यान अफ द म्याचहे नगद २ हजार पाँच सय ट्रफी, मेडल ओ प्रमाणपत्र प्रदान करजैना बा ।