जीत सुनिश्चित हुइलः उम्मेदवार राजसमझ
जनताके सेवक बन्के काम करब
पहुरा समाचारदाता
हसुलिया, ४ जेठ । स्थानीय तहके निर्वाचनमे कैलालीके कैलारी गाउँपालिका अध्यक्ष पदमे नेपाली काँग्रेसके उम्मेदवार डेहल राजसमझ चौधरी जित सुनिश्चित हुइल दावी करले बटै ।
नौ वडा रहल उ गाउँपालिकाके वडा नम्बर १ से ७ सम पुरा प्यानल सहित विजयी हुइलपाछे अपन जित सुनिश्चित हुइल दावी करले बटै । स्थानीय तह निर्वाचन २०७४ मे निवर्तमान गाउँपालिका अध्यक्ष नेकपा माओवादी केन्द्रके उम्मेदवार लाजुराम चौधरीसे झिनो मतान्तरसे पराजित हुइल उहाँ अप्खी चुनावमे माओवादी जिटल वडामे अपनेहुक्रे पुरा प्यानल सहिट कब्जामे लेहल बटैलै । उहाँ कहलै, ‘कैलारी गाउँपालिकामे यी चुनावमे नेकपा माओवादी केन्द्र दुसरा स्थानमे अर्थात प्रतिद्धन्दीमे बा । आघे चुनावमे कैलारी गाउँपालिका वडा नम्बर १ मे नेकपा माओवादी केन्द्रसे बालकृष्ण डगौंराथारु जिटल रहिट । अप्खीभर उहाँ नेपाली काँग्रेसके धोज हरिपाल बोहरासे पराजिट हुइलै । उ वडामे नेपाली काँग्रेसके बोहरा नेतृत्वके पुरे विजयी हुइल बा ।
वडा नम्बर २ जे आघे चुनावमे नेकपा माओवादी केन्द्रसे सन्तु चौधरी विजयी हुइल रहिट । अप्खी चुनावमे नेपाली काँग्रेसके विकास चौधरी नेतृत्वके पुरे प्यानल विजयी हुइल बा ।
कैलारी गाउँपालिका वडा नम्बर ३ नेकपा माओवादीके गढ मानल वडा हो । आघेक चुनावमे नेकपा माओवादी केन्द्रके कैलाश कुश्मी यी वडासे विजयी हुइल रहिट । अब्बेक चुनावमे माओवादी केन्द्रके गढ भत्कैटी नेपाली काँग्रेसके सन्तराम चौधरी नेतृत्व पुरे प्यानल विजयी हुइल बटै । निवर्तमान वडा अध्यक्ष कुश्मी फेरसे चुनावी दौडमे रहलेसेफे अब्बे पराजित हुइल बटै ।
कैलारी गाउँपालिका वडा नम्बर ४ मे पहिलेक चुनावमे भर नेपाली काँग्रेस विजयी हुइलमे अब्बे फेरसे नेपाली काँगे्रसके ठागुराम चौधरी नेतृत्व प्यानल विजयी हुइल बा । ओस्टेक वडा नम्बर ५ ओ ६ मे आघेक चुनावमे नेपाली काँग्रेस विजयी हुइल रहे कलेसे अब्बे फेरसे नेपाली काँग्रेस प्यानलसहित विजय हुइल बा । वडा नम्बर ५ ओ ६ मे विष्णु प्रसाद चौधरी ओ प्रेम बहादुर चौधरी दुसर चो विजयी हुइल हुइट ।
आब तीन ठो वडा केल मत गणना बाँकी रहल मने प्रतिद्धन्दीहुकनसे भारी मतान्तरसे आघे रहल ओरसे अपन जित सुनिश्चित रहल नेपाली काँग्रेसके राजसमझ चौधरी दाबी करलै । आघेक चुनावमे वडा नम्बर ७ ओ ८ मे नेकपा माओवादी केन्द्र विजयी हुइल रहे । ओ वडा नम्बर ९ मे स्वतन्त्रसे नेपाली काँग्रेसके उम्मेदवार विजयी हुइल रहिट ।
वडा नम्बर १ से ७ समके प्यानल विजयी हुइल ओरसे वाँकी वडामेफे नेपाली काँग्रेसके जिट हुइल अध्यक्ष पदके उम्मेदवार राजसमझ दावी करलैं । उहाँ कहलै, आघेक चुनावमे झिनो मतान्तरसे पराजित हुइल रहु । मने यी पाँच बरसके अवधिमे जनताके मन बुझना काम कैनु । अप्खी भर हमार जिट सुनिश्चित हुइल बा । पाँच बरसमे जनताके सेवक बन्के काम करब ।ं’
वडा नम्बर १ से ७ वडासमके मतगणना करेबेर अध्यक्ष पदमे नेपाली काँग्रेसके उम्मेदवार राजसमझ चौधरी ८ हजार ११५, उपाध्यक्ष भगवती कुमारी चौधरी ८ हजार १४६ सय मत पैले बटै । प्रतिद्धन्दीमे डेखल नेकपा माओवादी केन्द्रके उम्मेदवार तथा निवर्तमान अध्यक्ष÷उपाध्यक्ष लाजुराज चौधरी ५ हजार ७७, लक्ष्मी सत्गौवा ५ हजार १५७ मत पैले बटी । कैलारी–७ मे नेपाली काँग्रेसके दिपेन्द्र बम १९ सय २२ मत से पुरे प्यानल विजयी हुइल बा । हुकान प्रतिद्वन्दी माओवादी केन्द्रके कमल चौधरी १२ सय ५४ मत पैलै । यी वडा माओवादीके गढ मानल वडा हो । निवर्तमान गाउँपालिका अध्यक्ष लाजुराम चौधरीके वडा रहलसेफे नेपाली काँग्रेस अप्खी वार प्यानल सहिट विजयी हुइल बा ।
