निवर्तमान गापा अध्यक्षके वडामे काँग्रेसके पुरा प्यानल विजयी
पहुरा समाचारदाता
हसुलिया, ४ जेठ । कैलालीके कैलारी गाउँपालिका–७ मे नेपाली काँग्रेसके दिपेन्द्र बहादुर बम पुरे प्यानल सहिट विजयी हुइल बटै ।
वडा नम्बर ७ गाउँपालिकाके निवर्तमान अध्यक्ष लाजुराम चौधरीके वडा हो । स्थानीय तह निर्वाचन २०७४ सालमे यिहे वडासे नेकपा माओवादी केन्द्रके गाउँपालिका अध्यक्ष पदमे लाजुराम चौधरी ओ वडा अध्यक्षमे कमल प्रसाद चौधरी विजयी हुइल रहिट ।
माओवादी केन्द्रके गढ मानल यी वडामे अप्खी चुनावमे निवर्तमान वडा अध्यक्ष कमल चौधरी अपन प्रतिद्वन्दीसे ढेर मतसे पराजित हुइल बटै । वडा अध्यक्षमे नेपाली काँग्रेसके दिपेन्द्र बहादुर बम १९ सय २२ मत पाईबेर माओवादी केन्द्रके वडा अध्यक्ष कमल प्रसाद चौधरी १२ सय ५४ मत पैले बटै । उहाँ ६६८ मतसे पराजित हुइल बटै ।
वडा सदस्यमे विजयी हुइल नेपाली काँग्रेसके उमेशकुमार चौधरी १८ सय ३८, टुनीराम चौधरी १८ सय २१, महिला सदस्य सुन्दरीदेवी चौधरी १८ सय ९१, आरती विक १८ सय ७९ मत पाके विजयी हुइल बटै ।
कैलारी गाउँपालिका वडा ७ मे कुल ४१ सय ६५ मत परलमे निवर्तमान अध्यक्ष लाजुराम चौधरी १२ सय ६० मत केल पैले बटै । वडा नम्बर १ से ६ समके मत गणनामे हुकान ३८ सय १७ मत रहे । अब्बे ५ हजार ७७ मत पुगल बा ।
उपाध्यक्ष पदके उम्मेदवार लक्ष्मी सत्गौवाके ५ हजार १५७ मत पुगल बा कलेसे नेपाली काँग्रेसके उम्मेदवार राजसमझ चौधरीके ८ हजार ११५ मत पुगल बा । उपाध्यक्ष भवगतीकुमारी चौधरीके ८ हजार १४६ मत पुगसेकल बा ।
दुसरा स्थानमे रहल राप्रपा नेपालके होमबहादुर टिसरा स्थानमे भरल बटै । उहाँक अब्बे ४६ सय २२ मत रहल बा । कलेसे उपाध्यक्ष पिङला थारुके ३९ सय २५ मत रहल बा ।
