गोदावरीके प्रमुखमे काँग्रेस ओ उपप्रमुखमे एमाले विजयी

पहुरा समाचारदाता
धनगढी, ४ जेठ । कैलालीके गोदावरी नगरपालिकाके नगरप्रमुखमे नेपाली काँग्रेसके उम्मेदवार वीरेन्द्र भट्ट निर्वाचित हुइल बाटै । नेकपा एमालेके उम्मेदवार गोकर्ण भट्टहे पराजित कैटी उहाँ नगर प्रमुखमे निर्वाचित हुइल हुइट ।

काँग्रेसके उम्मेदवार वीरेन्द्र १५ हजार पाँच सय नौ मत प्राप्त करले बाटै कलेसे प्रतिस्पर्धी गोकर्ण ११ हजार दुई सय २४ मत प्राप्त करल हुइट । ओस्टके उपप्रमुखमे एमालेके उम्मेदवार शारदादेवी रोकाया निर्वाचित हुइल बाटी । उहाँ १० हजार छ सय ७० मत प्राप्त करले बटि ।

नगरपालिकाके उपप्रमुखमे सत्ता गठबन्धनके ओरसे नगर प्रमुखमे नेपाली काँग्रेस ओ उपप्रमुखमे एकीकृत समाजवादीहे उम्मेदवार बनाइल रहे । उ नगरपालिकामे सत्ता गठबन्धनके ओरसे उपप्रमुखकी उम्मेदवार रतना कडायत नौ हजार नौ सय ८३ मत प्राप्त करले बाटै । उहाँ निवर्तमान उपप्रमुख हुइट ।