गठबन्धनहे भारी मतान्तरसे हरैटी नागरिक उन्मुक्ति दुई पालिकामे विजयी
पहुरा समाचारदाता
धनगढी, ५ जेठ । गठबन्धनहे भारी मतान्तरसे हरैटी रेशम चौधरीके नागरिक उन्मुक्ति पार्टी कैलालीके दुई पालिकामे विजयी हुइल बा ।
स्थानीय तह निर्वाचनमे नागरिक उन्मुक्ति पार्टीके उम्मेदवार रामलाल डंगौरा थारु टीकापुरमे, ओ जोशीपुर गाउँपालिकामे चित्रबहादुर चौधरी भारी मतान्तरके साथ मेयर÷अध्यक्ष पदमे विजयी हासिल करले बटै ।
नागरिक उन्मुक्ति पार्टीके उम्मेदवार रामलाल डंगौरा थारु टीकापुरमे सत्तारुढ गठबन्धनसे नेपाली कांग्रेससे मेयरके लाग उम्मेदवारी डेहल नवराज रावलहे ३ हजार ढेर मतसे हरैटी विजय हुइल हुइट । नवनिर्वाचित थारु टीकापुर–७ के निवर्तमान वडाध्यक्ष समेत हुइट ।
उपमेयरमे भर गठबन्धनसे माओवादी केन्द्रसे उम्मेदवारी डेहल खडक शाह विजयी हासिल करले बटै । शाह नागरिक उन्मुक्तिसे उम्मेदवारी डेहल उल्का देवी विश्वकर्माहे हरैटी विजयी हासिल करल हुइट ।
कैलालीके जोशीपुर गाउँपालिकाके अध्यक्षमे रेशम चौधरी संरक्षक रहल नागरिक उन्मुक्ति पार्टीके चित्रबहादुर चौधरी विजयी हुइल बटै । उहाँ चार हजार ९०३ मत प्राप्त करले बटै ।
नेपाली कांग्रेसके बन्सराम बडायक थारु तीन हजार ३६८ मत प्राप्त करल रहिट । चित्रबहादुर ओ बन्सरामके मतान्तर एक हजार ५३५ बा ।
गाउँपालिकाके उपाध्यक्षेफे नागरिक उन्मुक्ती पार्टीके रेखादेवी कठरिया चार हजार ५ ८९ पाके विजयी हुइल बटी । उहाँक निकटतम प्रतिद्वन्द्वी माओवादी केन्द्रके दीर्घराज विनाडी तीन हजा ९६१ मत प्राप्त करले बटै ।
जोशीपुरमे यी आघे २०७४ सालके स्थानीय तहके निर्वाचनमे कांग्रेसके उम्मेदवार जिटल रहिट । जोशीपुरमे राष्ट्रिय प्रजातन्त्र पार्टीके अध्यक्षके उम्मेदवार भीमबहादुर वम तीन हजार १८९ ओ एमालेके उम्मेदवार केशरबहादुर डंगौरा एक हजार २९६ मत प्राप्त करले बटै ।
ओस्टेक भजनी नगरपालिकामे नागरिक उन्मुक्ती पार्टीके केवल चौधरी ओ जानकी गाउँपालिकामे उम्मेदवारी देहल गणेश चौधरी अग्र स्थानमे रहल बटै ।
