एकल महिलाके सवालमे प्रदेश सरकार गम्भीर बाः राज्यमन्त्री रैका
पहुरा समाचारदाता
लम्की, ६ जेठ । सुदूरपश्चिम प्रदेशके सामाजिक विकास राज्यमन्त्री टेकबहादुर रैका मन्त्रालयसे आव २०७९/८० के नीति तथा कार्यक्रममे एकल महिला एंव सिमान्तकृत समुदायके अधिकार ओ विकासहे प्राथमिकतामे राखल बटैले बाटै ।
नमूना एकल महिला मंच नेपालसे लम्की चुहानगरपालिका वडा नं ३ चिसापानीमे आयोजित एकल महिलाके सवाल ओ अधिकार सम्बन्धि अन्तरक्रिया कार्यक्रमहे संबोधन कैटी सामाजिक विकास राज्यमन्त्री रैका ओइसीन बटाइल हुइट ।
कार्यक्रममे टमान एकल महिला अगुवाहुक्रे राज्यमन्त्री रैकाहे एकल महिलाके सवालमे शिक्षा स्वास्थ रोजगारीके क्षेत्रमे विशेष ध्यानाकर्षण कराइल रहिट ।
कार्यक्रम नमूना एकल महिला मंच नेपालके अध्यक्ष दिपा विकके अध्यक्षतामे सम्पन्न हुइल रहे ।
ओस्टेक, राज्यमन्त्री रैका वादी समुदायके अधिकारके लागि विशेष कार्यक्रम नन्ना बटैले बटैं । वादी समुदाय सहयोग नेपालके आयोजनामे लम्कीचुहा नगरपालिका वडा नम्बर ३ स्थित बल्चौर वादी बस्तीमे आयोजित वादी समुदायके सवाल ओ अधिकार सम्बन्धी अन्तरक्रिया कार्यक्रममे राज्यमन्त्री रैका उ बाट कलैं ।
दलित विपन्न वादी समुदायसे भोग्टि आइल समस्या ओ पीडाके बारेमे अपने जानकार रहल बटैटि वादी समुदायके शिक्षा, स्वास्थ्य, रोजगारीके सवालहे लेके प्रदेश सरकार मार्फत विशेष कार्यक्रम नन्ना उहाँ बटैलैं ।
कार्यक्रममे राष्ट्रिय दलित आयोगके पूर्व सदस्य रमा वादी, वादी समुदायके अगुवा नन्दराम वादी, पत्रकार रमेश वादीलगायतहुक्रे वादी समुदायहे अभिन फेन गाँस, बास, कपास, शिक्षा, स्वास्थ्य ओ रोजागारीके समस्या रहल बटैले रहैं ।
कार्यक्रममे नेपाली काँग्रेसके महाधिवेशन प्रतिनिधि लक्ष्मण शाहीलगायत मन्तव्य व्यक्त करले रहैं । कार्यक्रम वादी समुदायके अगुवा पार्वती वादीके अध्यक्षतामे हुइल रहे ।
