नवनिर्वाचित अध्यक्ष, उपाध्यक्षसे पदभार ग्रहण
पहुरा समाचारदाता
धनगढी, ६ जेठ । कैलालीके कैलारी गाउँपालिकाके नवनिर्वाचित अध्यक्ष, उपाध्यक्ष शुकके पदभार ग्रहण करले बाटै । अध्यक्ष राजसमझ चौधरी ओ उपाध्यक्ष भगवती चौधरी पदभार ग्रहण करल हुइट ।
वडा अध्यक्ष भर आपन वडामे समय मिलाके पदभार ग्रहण कैना गाउँपालिकाके सूचना अधिकारी यगम कलेल बटैलै । पदभार ग्रहण कैनासे आघे गाउँपालिकाके अध्यक्ष चौधरी उपाध्यक्षसहित वडा अध्यक्ष, सदस्यहे पद तथा गोपनीयताके शपथ खवाइल रहिट । ओस्टके, निर्वाचित जनप्रतिनिधिहे निर्वाचन अधिकृत कृष्णप्रसाद नेपाल विजयी हुइल प्रमाणपत्र वितरण करल रहिट ।
कैलारी गाउँपालिकामे नेकपा (माओवादी केन्द्र)हे ‘क्लीन स्वीप’ कैटी नेपाली काङ्ग्रेस विजयी हुइल बा । १ से ९ समके वडा अध्यक्षमे क्रमशः ध्वज हरिपाल बोहरा, विकास चौधरी, सन्तराम चौधरी, ठगुराम चौधरी, विष्णुप्रसाद चौधरी, प्रेम चौधरी, दीपेन्द्र बम, तारामल कठरिया ओ खेमराज चौधरी निर्वाचित हुइल बाटै ।
