छोट लगानीमेफें ढेर कमाही
सागर कुस्मी
हसुलिया, ७ जेठ । समय अक्के नास नैहरठ । जे समय संगे नेंगे सेकठ ओहे हर काममे सफल हुइठ । एकर एक उदाहरण हुइँट विनय चौधरी । कैलाली जिल्लक् कैलारी गाउँपालिका वडा नम्बर ५ जबडहुवाके विनय चौधरी पर्हल लिखल जवान हुइँट् । उहाँ अब्बे कैलाली बहुमुखी क्याम्पससे बीएड संकायमे स्नातक कर्टि बटैं ।
अध्ययन करल सर्टिफिकेट बोक्के टमान संघसंस्थामे पुग्नै मने काम नैभेटैलैं । हुँकार योग्यता अन्सार डाम नैपाके उहाँ अपनही कुछ कर्ना सोंच अइलिन । ओहेमारे उहाँ अपन ठन रहल सीप बेलसके अपनही स्वरोजगार हुइनामे गेंह लगैनु उहाँ बटैलैं । आनेक काम करलसे टे अपन डोकान खोलके अपनही कुछ करुँ कहिके एहोर भुट्ला कट्ना काममे लग्नु उहाँ कलैं, पर्हाइ करक योग्यता अन्सार कामडाम नैपाके मै इ पेशामे लागल उहाँ बटैलैं ।
उहाँ अझ्कल ७ बरससे हसुलिया बजारमे चाँदनी हेयर कटिंग संचालन करले बटैं । ३० बरसके विनय चौधरी भुट्ला कट्ना सीप सिख्के आत्मनिर्भर हुइल बटैँ । उहाँ अब्बे महिनक् १५ हजारसे लेके २० हजारसम अम्दानी करटी बटैँ । यिहे अम्दानी उहाँ अपन घर खर्च, अपन पर्हाइ खर्च, बिरुवा खर्च सबकुछ व्यहोर्टी आइल बटैँ ।
विनय कठैँ, मै समयमे यि सीप सिख्के अपन गुजारा चलैटी आइल बटुँ । पर्हेबेर इ सीप सिख रख्ले रहुँ उहाँ कलैं, यदि समयमे यि काम नै सिख्टु कलेसे महिनफें गुजारा चलैना बहुट कठिन हुइना रने । मोर संग्गेक लर्का समयमे सिप नैसिख्के अब्बे भारत ओर मजदुरी करटी आइल बटैँ उहाँ बटैलैं ।
भुट्ला कट्ना मजा काम हो, जौन छोट लगानीसे सुरु कैके छोटे समयमे ढेर आम्दानी होजाइठ । उहाँ फेन कठैँ, हम्रे थारु युवा ना ढेर पर्हे सेक्ठी, ना टे सीप सिख्के काम करे सेक्ठी, इहे कारणसे हम्रे प्रगति फें करे नैसेक्ठी । उहाँ कठैं सबसे कम लगानी कैके सबसे ढेर कमाइ सेक्ना कलक इहे काम हो । ओहेमारे मै एहोरे लागल बटुँ, उहाँ कहलैं ।
जिन्गीमे सफल हुइकलाग अपन दिलसे मेहनत करलेसे हर कानमे सफलता पाइ सेक्जाइठ । एकर एक्ठो उदाहरण हुँइट् विनय चौधरी । उहाँ इहे पेशासे अपन डाइ बाबा, डाडा भौजी, भटिजिया, गोसिनियाँ ओ अपन जिउ सुखीसे परिवार गुजारा चलैटि बटैँ ।
विनय जस्टे अझकलके जवान ठँरियन सीप ओ जाँगर लगैलेसे अपने गाउँघरमे फें स्वरोजगार बने सेक्जाइठ । छोट व्यवसायसे कैके फेन अपन भारी व्यवसाय बह्राइ सेक्जाइठ । जे दुखसे लरठ ओहे जिन्गीमे पार हुइ सेकठ । इहे सीप सिख्के हुँकारे डोकानमे अब्बे लोकेन्द्र चौधरीफें ओहैं काम कर्टी बटैं । बैठल से टे इहे काम ठिक लागल । इहे कामसे सन्तुष्ट होके परिवारमे गुजारा मजेमजे चल्टी रहल उहाँ बटैलैं ।
अस्टेके, हसुलियामे अब्बे ५ जाने थारु समुदाके युवा लोग इहे नौवाँ काम कर्टी बटैं । नगेन्द्र चौधरी, जोगेन्द्र चौधरी, कालिचरण चौधरी, मानबहादुर चौधरी लगायत युवा अब्बे इहे काम कर्टी आइल नगेन्द्र चौधरी बटैलैं ।
उहाँ इहे काममे अपन डोकानसे महिनक २० हजारसे उप्पर कमैटी रहल बटैलैं । उहाँ कठैँ, सबसे मजा ओ कम आम्दानीसे ढेर नाफा कमाइ सेक्ना कलक जवान लर्कनके लाग भुट्ला कट्ना काम सब्से अच्छा हो उहाँ कठैं । अइना दिनमे फें सीप सिख्के इहे काममे लग्ना सल्लाह डेठैं, नगेन्द्र चौधरी । थारु युवा फेन विनय चौधरी जस्टे सीप सिख्खा कैके अपन भविष्य ओजरार कैनामे मन लगाइ । उहाँक जस्टे मिहनेत कैके पस्ना चुहाइ अपन गाउँ ठाउँमे ।
