पत्रकार गणेश चौधरी जानकीके अध्यक्षमे निर्वाचित
‘जानकी गाउँपालिकाके समग्र विकासमे लागम’
पहुरा समाचारदाता
धनगढी, ७ जेठ । कैलालीके जानकी गाउँपालिकामे नागरिक उन्मुक्ति पार्टीसे पत्रकार गणेश चौधरी अध्यक्षमे निर्वाचित हुइल बाटै । उहाँ सात हजार १५१ मत लानके विजयी हुइल हुइट । चौधरी नेपाली काँग्रेसके परशुराम महतोहे पराजित कैटी अध्यक्ष पदमे निर्वाचित हुइल हुइट । ओहकान निकतम प्रतिद्वन्दी नेपाली काँग्रेसके परशुराम महतो पाँच हजार २४२ मत प्राप्त करल रहिट ।
ओस्टके उपाध्यक्षमे फेन नागरिक उन्मुक्तिके लालमती देवी कठरिया विजयी हुइल बाटी । उहाँ छ हजार ५६२ मत लानके विजयी हुइल हुइटी । ओहकान प्रतिस्प्रधी नेकपा एमालेके गीता चौधरी चार हजार ८५८ मत पैले बाटी । ओस्टके गठबन्धन ओरके उपाध्यक्षके उम्मेदवार माओवादी केन्द्रके जयप्रकाश दहित चार हजार ५४८ मत लानल रहिट ।
नव निर्वाचित अध्यक्ष चौधरी दुइ दशकसे ढिउर समय पत्रकारिता क्षेत्रमे बिटैले बाटै । उहाँ नेपाल आदिवासी जनजाति पत्रकार महासंघ (फोनिजके निवर्तमान) सल्लाहकार समेत हुइट ।
पत्रकारिता मार्फत उत्पीडन, अन्यायमे परल जाति, समुदायके हक अधिकारके वकालत करटी आइल चौधरी गाउँपालिकाके समग्र विकास ओ उ मुद्दाके उठान राजनीति मार्फन कैना बटैले बाटै । ओस्टके उत्पीडनमे परल सक्कु जाति, समुदायहे न्याय डेहुवाइक लाग ओ पहिचानके मुद्दा उठानके लाग राजनीति ओर आइल उहाँ बटैले बाटै ।
राजनीतिक दल विशेष कैके नेपाली काङ्ग्रेस, नेपाल कम्युनिष्ट पार्टी (एमाले), नेपाल कम्युनिष्ट पार्टी (माओवादी केन्द्र) मजा काम करे नैसेकल कारण मजा कैना उद्देश्यके साथ अपने राजनीतिमे हाठ डारल बटैलै । ‘टमान दलमे आवद्ध नेतालोग काम कर डेटै कलेसे पत्रकारिता कैटी रहल व्यक्ति राजनीतिमे आइ नैपरट’, उहाँ कहलै ।
उत्पीडनमे परल सक्कु जाति, समुदायहे न्याय डेहुवाइक लाग फने अपने राजनीतिमे लागल उहाँके कहाइ बा । टीकापुर घटनाके बेला हेर्ना हो कलेसे भदौ ७ गतेके घटनाहे आपराधिक बनागैल ओ ओकर प्रतिसोधमे भदौ ८ गते हुइल घटनाहे आपराधिक नैडेखगैल’, उहाँ कहलै ।‘राज्यसे जौन विभेद करटी रहल बा । उ विभेद, अन्याय, अत्याचार विरुद्ध न्यायके लाम मै राजनीतिमे लागल हुइटी ।’ पहिचानके मुद्दाहे सबसे पहिले माओवादी पार्टी उत्थान करल रहे । मने, उ मुद्दाहे माओवादी बिसरा डेहल उहाँके बुझाइ बा । माओवादीसे छोर्टी गैल पहिचानके मुद्दाहे आब नागरिक उन्मुक्ति पार्टी आघे बह्रैना उहाँ बटैलै ।
के हुइट गणेश चौधरी ?
नागरिक उन्मुक्ति पार्टीके ओरसे जानकी गाउँपालिकाके अध्यक्षके निर्वाचित गणेश चौधरी बाबा दिबुवा चौधरी ओ डाई बासमति चौधरीके कोखसे २०३३ साल फागुन १८ गते जानकी गाउँपालिका वडा नम्बर ३ सुवर्णपुरमे जन्मल हुइट ।
गाउँके भृकुटी प्राविसे प्राथमिक शिक्षा, महेन्द्र शीशु माविसे निम्न माध्यामिक ओ वीरेन्द्र विद्या मन्दिर मावि टीकापुरसे एसएलसी करल हुइट । आरआर क्याम्पस काठमाडौंसे बीए पास करल चौधरी पूर्वाञ्चल विश्व विद्यालयसे आम सञ्चार ओ पत्रकारितामे स्नात्तकोत्तरसमके अध्ययन करले बटै ।
२०५६ सालसे कैलालीहे कार्यक्षेत्र बनाके पत्रकारिता सुरु करल चौधरी समाचार, लेख, पुस्तक लेखन ओ नेतृत्वमे सक्रिय बटै । काठमाडौंसे पत्रकारिता शुरु करल चौधरीसे टीकापुरसे अपनही प्रकाशक÷सम्पादक हुके हाम्रो परिचर्चा साप्ताहिक, अर्धसाप्ताहिक, दैनिक रुपमे पाँच वर्ष प्रकाशन करलै ।
पाछेक २० वर्ष कान्तिपुर दैनिकके सम्वाददाताके रुपमे काम करल अनुवभ उहाँकठन रहल बा । टीकापुरमे समुदायके ओरसे स्थापना हुइल सामुदायिक रेडियो टीकापुर एफमके स्थापनाकालमे प्रवन्ध निर्देशक रहिके संस्था स्थापना ओ सञ्चालनमे योगदान करले बटै ।
मिडिया व्यक्तिगत प्रभावसे नैहोेके नागरिकसे अपनही चलैना ओ अपन आवाज अपनही बोले पैना हुई परठ ओ पत्रकार पाछे पारल समाजके पक्षधर ओ उच्च पदस्थहुकनके गलत कार्यके विरुद्ध कलम चलैम कहिके काम करे परठ कना मान्यता चौधरीके रहल बा ।
ओस्टे भावनाके साथ चौधरी जीवनके २० वर्ष यिहे खर्चले बटै । दुई दशक लेखन पेशामे बिटाइल चौधरी वादी, राजी, मुक्त कमैंयाँ जैसिन सीमान्तकृत समुदायके बारेमे समाचार लेखन अध्ययन अनुसन्धान करले बटै कलेसे थरुहट आन्दोलन टीकापुर घटनाके विषयमे पुस्तक प्रकाशन करले बटै ।
खोज पत्रकारिता, मानव अधिकार, नेतृत्व विकास, द्वन्द्व व्यवस्थापन, शान्तिका लागि संवाद, सामुदायिक मध्यस्तता जैसिन विषयगत तालिम लेके समाजके टमान क्षेत्रमे सहयोग करटी आइल बटै । चौधरी अपन जीवनकालमे नेतृत्वकेफे अनुभव बिटोले बटै ।
उहाँसे नेपाल पत्रकार महासंघके टमान पदमे रहनाके साथे सामुदायिक रेडियो प्रसारक संघके केन्द्रीय सदस्य, आदिवासी जनजाति पत्रकार महासंघके केन्द्रीय उपाध्यक्ष समेत हुके संस्था परिचालन ओ नेतृत्वके अनुभव बा कलेसे टमान सामाजिक संस्थाके पदमे रहिके संस्था ओ संगठन प्रणालीके बारेमे ज्ञान बा ।
पत्रकारिता कर्म करटी रहेबेर समाजके आँखीसेफे मजा मुल्यांकन करले बा । गणेशके पत्रकारिता कर्मके मुल्यांकन करटी प्रेस काउन्सिलसे प्रदान कैना युवा पत्रकारिता पुरस्कार, नेपाल पत्रकार महासंघसे उमासिह स्मृति पत्रकारिता पुरस्कार, थारु पत्रकार संघसे प्रदान कैना थारु पत्रकारिता पुरस्कार लगायत टमान संघ संस्थासे पुरस्कार डेहल बा ।
राजनीतिक रुपमे तटस्थ रहे पर्ना पत्रकारिताके सिद्धान्त अनुसार राजनीतिसे उप्पर उठके पेशागत मर्यादामे बैठल चौधरी पछिल्का समय जातजातिके अधिकारके पक्षमे आकर्षक नारा डेहल नेकपा माओवादी केन्द्रमे आकर्षित हुइलपाछे थारु मुक्तीमार्चाके जिल्ला उपाध्यक्ष हुके छोट समय काम करलपाछे स्थानीय तह निर्वाचन २०७९ आईबेर थारु तथा पाछे परल समुदायके हक अधिकारके लाग नागरिक उन्मुक्ति पार्टी गठन हुइलपाछे यिहे पार्टीसे जानकी गाउँपालिकाके अध्यक्षके उम्मेदवार बनल बटै ।
पत्रकारितामे रहिके हमेशा समाजके मजा पक्ष ओ नइमजा पक्षके निगरानी करटी रहल चौधरी मजा पक्षहे आत्मसात करटी रहल ओ स्थानीय तहके निर्वाचनमे निर्वाचित हुइलसे नइमजा पक्षसे जोग्टी, मजा पक्ष अंगालके आघे बढना प्रतिवद्धता करले बटै ।
