धनगढी–८ के वडाध्यक्षमे एमालेके चौधरी विजयी

पहुरा समाचारदाता
धनगढी, ७ जेठ । कैलालीके धनगढी उपमहानगरपालिका–८ के वडाध्यक्षमे नेकपा (एमाले) के जुगराम चौधरी आपन प्यानलसहित विजयी हुइल बाटै । नेपाली काँग्रेसके उम्मेदवारहे झिनो मतान्तरसे पराजित कैके उहाँ अध्यक्षमे विजयी हुइल हुइट । वडा अध्यक्षमे एमाले ओ नेपाली काँग्रेसबीच कडा प्रतिस्पर्धा हुइल रहे ।

उहाँ आपन निकतम प्रतिद्वन्दी नेपाली काँग्रेसके उम्मेदवार देवराज जोशीहे पराजित करल हुइट । सुरुसे टक्कर डेखगैल मतपरिणाममे अन्त्यमे जुगराम चौधरी ५ मतके अन्तरसे जोशीहे हराइल रहिट ।

धनगढी उपमहानगरपालिका वडा नम्बर ८ पुर्वमन्त्री एवं एमालेके पोलिटव्युरो सदस्य, कैलाली इन्चार्ज नारदमुनी रानाके गृह वडा फेन हो । इहीसे आघेक निर्वाचनमे काँग्रेस प्यानलसहित जितल रहे । धनगढी वडा नम्बर ८ मे दुई हजार ७४५ मत परल रहे ।