बोक्सीनीयाके आरोपमे निर्घात कुटपिट
कञ्चनपुर, ७ जेठ । कञ्चनपुरके कृष्णपुर–४ मे एक महिलाहे बोक्सीनीयाके आरोपमे निर्घात कुटपिट हुइल बा । उ महिलाहे अपने देवर गणेश बिक निर्घात कुटपिट करल हुइट ।
कुटपिटसे महिलाके कपार ओ शरीरमे चोट लागल बा । ओहकान उपचार धनगढीस्थित सेती प्रादेशिक अस्पतालमे हुइटी रहल बा । एकल महिलासमेत रहल बिकहे लहेरके देउताके लगाइल कहटी लम्मा समयसे अपने कुटपिटमे पलर उहाँके कहाइ बा ।
घरमे काम कैटी रहल अवस्थामे गाली कैटी एक्कासी देवर भठ्ठासे आक्रमण करल बिक बटैली । आक्रमणपाछे अपने बेहोस हुइल उहाँके कहाइ बा । पीडित महिलाके दुई छाइ ओ एक छावा बाटिन् ।
बोक्सीनीया लगाइल कहटी ओहकान देवरुवा गणेश आपन कौनो प्रगति तथा परिवारिक स्वास्थ्यस्थिती मजा नैहुइल कहटी कुटपिट तथा झगडा कैटी आइल पीडित महिलाके आरोप रहल बा ।
शुकके ठाडो उजुरीके आधारमे गणेश बिकहे ईलाका प्रहरी कार्यालय गुलरिया कञ्चनपुर नियन्त्रणमे लेले बा । प्रहरी भर बोक्सीनीयाके आरोपमे कुटपिट हुइल कहिके जाहेरी नैआइल कहटी पन्छे खोजल बटाइल बा । इ विषयमे प्रहरी कौनो प्रतिक्रिया डेहे मानल नैहो ।
