धनगढीके मेयरमे गोपाल हमालके जीत निश्चित
पहुरा समाचारदाता
धनगढी, ७ जेठ । धनगढी उपमहानगरपालिकामे जारी मतगणनामे मेयरके स्वतन्त्र उम्मेदवार गोपाल हमालके जीत निश्चित हुइल बा । गन्न बाँकी मतसे मतान्तर ढेर हुइलओरसे हमालके जीत निश्चित डेखल हो ।
मुख्य निर्वाचन अधिकृतके कार्यालयसे शनिच्चर साँझ ५ बजे सार्वजनिक करल मतपरिणामअनुसार मेयर पदके स्वतन्त्र उम्मेदवार हमाल ११ हजार ७५८ मतके अग्रता लेले बटैं ।
६३ हजार ७१५ मत परल धनगढीमे ५६ हजार २२६ मत गनलमे हमाल २४ हजार ५२९ मत पैले बटैं । सत्ता गठबन्धनसे उम्मेदवार बनल नेपाली काँग्रेसके नृपबहादुर वड १२ हजार ७७१ मत प्राप्त करले बटैं ।
ओस्टेक, नेकपा एमालेके उम्मेदवार रणबहादुर चन्द ७ हजार ३८३ मत नान्के तेसर स्थानमे बटैं । ओस्टेक, उपमेयरमे माओवादी केन्द्रके शान्ति अधिकारीसे एमालेके कन्दकला राना आगे हुइल बटि । राना १२ हजार ५९४ ओ अधिकारी ११ हजार ५८९ मत पैले बटि । आब धनगढीमे करिब साढे ७ हजार मत गन्न बाँकी बा ।
