धनगढीके मेयरमे गोपाल हमाल, उपमेयरमे कन्दकला राना विजयी
पहुरा समाचारदाता
धनगढी, ८ जेठ । धनगढी उपमहानगरपालिकाके मेयरमे स्वतन्त्र उम्मेदवार गोपाल हमाल विजयी हुइल बटै । हमाल निवर्तमान मेयर काँग्रेसके नृपबहादुर वडहे दोब्बर मत लानके पराजित करल हुइट । आघेक निर्वाचनमे हमाल वडसे पराजित हुइल रहिट ।
हमाल कुल गिरल ६३ हजार ७१५ मतमध्ये २६ हजार ८६५ मत पैले बाटै । निकटतम् प्रतिस्पर्धी नेपाली काँग्रेसके वड १४ हजार ८१७ मत किल पैलै । टिसरा हुइल एमालेके रणबहादुर चन्द ९ हजार ११५ मत लन्ले बाटै ।
२०७४ सालके स्थानीय तहके चुनावमे हमाल काँग्रेसके वडसे २७ सय मतान्तरसे पराजित हुइल रहिट । मने इ बेरके चुनावमे काँग्रेस माओवादी, एकीकृत समाजवादीके साथ पैलेसे फेन वड हार व्यहोरले बाटै ।
उपमेयरमे भर एमालेके कन्दकला राना विजयी हुइल बटि । मतगणनाके सुरूवातसे अग्रता लेहल माओवादी केन्द्रके शान्ति अधिकारीहे २८०९ मतान्तरसे पराजित करल हुइटी ।
राना १५ हजार ४७९ मत पाइबर अधिकारी १२ हजार ६७० मत किल पैली । स्वतन्त्र उम्मेदवार प्रभाकर भण्डारी ६६०९ मत लन्ले बाटै ।
१९ ठो वडा रहल धनगढीमे काँग्रेस ११ ठो वडामे जिटल बा कलेसे एमाले ६ ठो ओ माओवादी केन्द्र २ वडा जिटल बा । वडा नम्बर १, २, ३, ४, ५, १४, १५, १७, १९, ९ ओ १३ काँग्रेस जिटल बा कलेसे एमाले ७, १०, ११, १२ ओ १ ओ माओवादी केन्द्र ६ ओ १६ नम्बर वडा जिटल बा ।
