पार्टीके चुनाव चिन्ह किल रहे, मै स्वतन्त्र उम्मेदवार रहुँः वड
पहुरा समाचारदाता
धनगढी, ८ जेठ । नेपाली काँग्रेसके केन्द्रीय सदस्य तथा धनगढी उपमहानगरपालिकामे गठबन्धनके ओरस मेयर पदके उम्मेदवार नृप बहादुर वड अपने स्वतन्त्र उम्मेदवार हुइल बटैले बाटै ।
धनगढी उपमहानगरपालिकाके निवर्तमान मेयर समेत रहल वड स्वतन्त्र उम्मेदवार गोपाल हमालसँग पराजित हुइलपाछे प्रतिक्रिया डेटी अपने पार्टीसे निर्वाचन लरलेसे फेन स्वतन्त्र जस्टे उम्मेदवार हुइल बटाइल हुइट ।
यहाँ गठबन्धन हुइलेसे फेन नाउँके गठबन्धन रहे वड कहलै “मै पार्टीसे चुनाव लरलेसे फेन स्वतन्त्र लरल हुँ ।” उहाँक इ कहाइसे गठबन्धन ओ पार्टीसे पूर्ण असहयोग हुइलपाछे आपनहे स्वतन्त्र रहल आशय डेहठ् ।
वड अपने मेयर होके करल मजा कामहे निरन्तरता डेना नवनिर्वाचित मेयर गोपाल हमालहे आग्रह करलै । मै बहुट मजा मजा कामके सुरुवात करले बाटुँ ओ विकासके जग बैठसेकल बा । उहाँ कहलै “मजा कामहे निरन्तरता डेबी नैमजा कामहे सच्याके जैबी ओ मजा काममे मोर ओरसे सहयोग रही ।”
