लम्कीचुहा क्षेत्रके पूर्वपश्चिम राजमार्ग ४ लेन बनाबः नगरप्रमुख शाही
पहुरा समाचारदाता
लम्की, ८ जेठ । लम्कीचुहा क्षेत्रके पूर्वपश्चिम राजमार्गहे चार लेनके सडकमे स्तरोन्नति कैना नगरप्रमुख सुशीला शाही बटैले बटी ।
अँट्वारके नव निर्वाचित जनप्रतिनिधिहुक्रनहे प्रमाणपत्र ग्रहण कार्यक्रममे पत्रकारनहे संक्षिप्त प्रतिक्रिया डेटी उहाँ ओइसीन बटाइल हुइटी । ओस्टके उहाँ लम्कीचुहाके विकासमे जोड डेना बटैली ।
कार्यक्रममे निर्वाचन अधिकृत हिरालाल चौधरी जनताके मतके सही मूल्यांकन हुइनामे विश्वास लेहल बटैलै । ‘निर्वाचित सक्कु पदाधिकारीनहे हार्दिक धन्यवाद, साथे निर्वाचन सफल पर्नामे सहयोग करुइया राजनीतिक दलके प्रतिनिधि उम्मेदवार, सुरक्षाकर्मी, मतदाता, सञ्चारकर्मीनहे हार्दिक धन्यवाद व्यक्त करटुँ ।’
अधिकृत चौधरी कहलै, ‘मेयर ओ उपमेयर महिला रहल दुलर्भ संयोग इ पालिकामे रहल बा । नगरपालिका समृद्धिके शिखर चुमे ओ जनताके मतके सही मूल्यांकन हुइनामे विश्वास लेले बाटुँ ।’
गठबन्धनके साझा उम्मेदवार रहल शाही १२ हजार ७१३ मत प्राप्त कैके विजयी हुइल बाटी । उहाँ नेकपा (एमाले) के उम्मेदवार महादेव बजगाईहे हराइल हुइटी । उहाँ कैलालीके पहिल निर्वाचित महिला नगर प्रमुख समेत हुइटी ।
