नगरप्रमुख हमालसे पदभार ग्रहण
पहुरा समाचारदाता
धनगढी, ९ जेठ । धनगढी उपमहानगरपालिकाके नवनिर्वाचित नगर प्रमुख गोपाल हमाल पदभार ग्रहण करले बटै ।
ज्योतिष शास्त्र अनुसार पुजाआजा कैटी हमाल पदभार ग्रहण करल हुइट । नगरप्रमुख हमाल मुख्य निर्वाचन अधिकृत जयानन्द पनेरुसे पद तथा गोपनियताके सपथ समेत लेहल रहिट । साथे उहीसे आघे सोम्मार सकारे धार्मिक स्थल बेहडाबाबामे समेत पुजा तथा दर्शन करल रहिट ।
अँट्वारके सम्पन्न मतगणना अनुसार हमाल २६ हजार ८६५ मत पैटी उपमहानगरके प्रमुखमे विजयी हुइल रहिट । ओहकान प्रतिद्वन्द्वी सत्ता गठबन्धनसे उम्मेदवार बनल नेपाली काँग्रेसके नृपबहादुर वड १४ हजार ८१७ मत प्राप्त करल रहिट ।
ओस्टके, नेकपा एमालेके उम्मेदवार रणबहादुर चन्द ९ हजार ११५ मत लानल रहिट । उपमेयरमे एमालेके कन्दकला राना विजयी हुइल बटी । सुरुवाती चरणसे माओवादी केन्द्रके शान्ति अधिकारीहे पच्छ्यइटी रहल राना अन्ततः अधिकारीहे पाछे परटी उपप्रमुखमे विजयी हुइल रही ।
उहाँ १५ हजार ४७९ मत पाइबर माओवादी केन्द्रके अधिकारी १२ हजार ६७० मत पैली । स्वतन्त्र उम्मेदवार प्रभाकर भण्डारी ६ हजार ६०९ मत पैलै । गत वैशाख ३० गते शुकके हुइल स्थानीय तह निर्वाचनमे धनगढीमे रहल ९३ हजार १५१ मतदातामध्ये ६३ हजार ६४७ जाने मतदान करल रहिट । उपमहानगरमे ९७ जाने जनप्रतिनिधि चुनक लाग मतदान हुइल रहे ।
