समृद्ध धनगढीके लाग नवनिर्वाचित जनप्रतिनिधिहे चन्दके आग्रह

पहुरा समाचारदाता
धनगढी, ९ जेठ । धनगढी उपमहानगरपालिकामे नगरप्रमुख पदमे नेकपा (एमाले)के उम्मेदवार रहल रणबहादुर चन्द नवनिर्वाचित जनप्रतिनिधीहुक्रनहे समृद्ध धनगढी बनैना मेरके काम कैना आग्रह करले बाटै । सोम्मारके धनगढीमे पत्रकार सम्मेलनके आयोजना कैटी नेता चन्द पार्टीके प्रतिवद्धता पत्रके मर्मअनुसार कार्य कैना नवनिर्वाचित नगर नेतृत्वहे सुशासनसहितके समृद्ध धनगढी बनैना मेरके काम कैना आग्रह करल हुइट ।

‘नगर प्रमुख गोपाल हमाल ओ उपप्रमुख कन्दकला रानालगायत १९ वडाके अध्यक्ष ओ सदस्यहे बधाईसहित उत्कृष्ट कार्यकालके लाग शुभकामना व्यक्त करटुँ’ उहाँ कहलै‘शुशासनसहितके समृद्ध धनगढी बनाइक लाग साथ सहयोग ओ सहकार्य कैटी आघे बह्रना प्रतिवद्धता करटुँ ।’ उहाँ छोट प्रचार प्रसारके समय, स्वतन्त्र उम्मेदवारके पाँच बरससे पूर्वतयारी, नेकपा एमालेहे पाँच दलीय गठबन्धनमार्फतके चौतर्फी घेराबन्दी ओ लम्मा समय पार्टीके एकता–विभाजन जैसिन कार्यसे प्रमुख पदमे हार व्यहोरे परल बटैलै ।

‘अव्यवस्थित, कमजोर पार्टी संगठन ओ प्राविधिक कमि कमजोरी लगायतके कारणसे इ निर्वाचनमे मै सफलता प्राप्त करे नैसेक्नु’ उहाँ कहलै –‘व्यक्ति वा दलके सफलता वा असफलता मुख्य बात नैहो मुख्य बात हम्रे बरवार बलिदानी ओ संघर्षसे स्थापित करल संघीय लोकतान्त्रिक गणतन्त्रसे सफलता प्राप्त करले बाटी ।’

उहाँ अपने पराजय व्यहोरलेसे फेन नगर उपप्रमुखसहित छ वडामे वडा अध्यक्षसहित सदस्य निर्वाचित हुइनामे विजयी हुइल बटैलै ।‘२०७४ के निर्वाचनमे हम्रे उपप्रमुख निर्वाचित करे नैसेक्ली । अब्बे उपप्रमुखसहित छ वडामे हमार उम्मेदवार विजयी हुइल बाटै’ उहाँ कहलै–‘इहीसे हमार पार्टीहे धनगढीमे थप बलगर ओ सशक्त बनैले बा । पार्टीभिट्टर सुधार हुइटी गैल बा ।’ उहाँ निर्वाचनहे सफल बनाइक लाग खटल कर्मचारीसे आम मतदाताहे आभार फेन व्यक्त करलै ।